Сөөлгү үеде тыва чон Шагаа байырлалын дыка-ла чараш, шынарлыг эрттирер апарган. Улуг-биче чон Шагааның ёзу-чаңчылдарын сагывышаан, Чаа чылды уткууру чаңчыл апарганы өөрүнчүг-дүр.
Тыва чон Шагаа үүжезин баш удур шыгжап, далган-тараазын, ак чеминиң дээжизин белеткеп алырын билир болгай бис. Изиг сүттүг шайга тыва далганны, ааржыны, саржагны база чигирни холааш, чиирге, кайы хире чаагай ийик. Амгы үениң ажы-төлү тыва далган чивес боор-дур.
Чогум уруглар садтарынга, школаларга, албан черлеринге Шагаа байырлалын калбаа-биле оюн-тоглаалыг байырлап турарын көөрге, чоргааранчыг-дыр. Байырлал хүннеринде кайда-даа тыва национал идик-хевин кеткен, оюн-тоглаада киришкен, мөөрейлешкен боор-дур. Чон тыва ёзу-чаңчылдарынче катап эглип, чараш байырлалын шынарлыг эрттирип турары эки-дир.
Шагаа дээрге тываларның
Сарыг шажын ёзузунда,
Чаа чылды уткуурунуң
Шаандан тура байырлалы.
Аарыг-аржык, думаа-ханаа,
Айыыл-халап өршээзин деп,
Алгап-йөрээп, аравыста
Амыр-менди солчуулуңар.
Сарыг саржаг, сүттүг шайны,
Чаглыг эъттиг чаагай мүннү
Чалбырааштыг одувуска
Чалбаргылап, өргүүлүңер.
Аалдарывыска үнчүп-киржип,
Аъш-чемден чооглаалы.
Арагага дегбээлиңер,
Амыр-менди байырлаалы.
Шаандагы өгбелерниң
Чаа чылдаарын сагывышаан,
Чаа чылды байырлаалы,
Шагаавысты эрттирээли.
Чечекмаа САДИ,
ТР-ниң алдарлыг ажылдакчызы.
“Шын” №13 2024 чылдың февраль 21