Саң салыр ёзулалды Шагааның бир чаазының даң бажында Кызыл хоорайга болгаш республиканың кожууннарынга эрттирген. Тыва Республиканың Баштыңы Владислав Ховалыг, Чазак Даргазының оралакчызы Алик Монгуш болгаш Тыва Республиканың Камбы-ламазы Гелек Нацык-Доржунуң киржилгези-биле "Кадарчы" тураскаалга саң салыр ёзулал болган.
Саң салыр ёзулалдың мурнунда киржип келген чонга республиканың Баштыңы Владислав Ховалыг Шагаа байырын чедирип, тыва чоннуң чаңчыл болган ёзу-чаңчылдарының ужур-утказын, ону сагып, амыдыралга боттандырып чоруурун чагып чугаалаан.
Чаа чылды уткуп тура саң салыр ёзулал дыка чугула. Ону Шагааның бир чаазының эртенинде белеткеп алгаш, хүн-биле деңге саңын салыр. Лама башкылар улуг номналды эрттирип, бөдүүн чон эккелген ак чеминиң дээжизин хып турар отка өргүүрге, оран-таңды ээлери ооң чыдынга аъштанып-чемненир, аал-коданга, аймак чонну карактап-камгалаар деп оштап турар. Саң салыр ёзулалды ооң мурнунда чылдарда караңгы дүне салып турган болза, сөөлгү ийи чылда хүннүң баштайгы херели-биле деңге салыр кылдыр чурумчуткан.
Саңның оду аажок хөрлээленип, чалбыышталып кывар болза, эки чүүлдү оштап турар болур.
Саң салыр ёзулал соонда, чыылган чон кышты хүр-менди ажып эрткенин айтыржып, аразында чолукшааннар.
Чиңгис СААЯНЫҢ тырттырган чуруктары.