Тываның Саң-хөө яамызы биле үндүрүг албаны кижилерден эт-хөреңги үндүрүглерин чыырының шалыпчы айын эрттирер. Республиканың Баштыңы Владислав Ховалыг сентябрь 20-де шалыпчы айны эгелээриниң айтыышкынынга атты салган.
Ийи ведомствонуң күжү-биле боттарының бюджеттерин долдуруп алырынга сонуургалдыг муниципалдыг эрге-чагырга черлери эт-хөреңги, танспорт болгаш чер үндүрүглерин үе шаанда төлээриниң чугулазынга улуг тайылбыр ажылын чорударын планнаан. Амгы хоойлужудулга езугаар үндүрүглерни декабрь 1-ге чедир төлээр ужурлуг.
Саң-хөөчүлерниң Тываның Баштыңынга таныштырган үндүрүглер талазы-биле анализинден көөрге, хамаатыларның эт-хөреңги үндүрүглери өскен. 2021 чылда ол 295,7 млн рубль тургаш, 2023 чылда 329,2 млн рубль четкен. 2023 чылда хары угда 21,6 млн рубльга өскени – эки көргүзүг.
Ол чурттакчы чоннуң садыгланыр арга-шинээ улгатканында база өнчүзүнде шимчээр болгаш шимчевес эт-хөреңги объектилери көвүдээнинде деп, специалистер тайылбырлаан. Эрткен чылын чүгле чиик машиналар саны 2,8 муңга көвүдеп, оларның ниити саны 61 муң ажа берген – ийи өг-бүле-ле ортумаа-биле үш машиналыг.
Ооң багай талазы – хамаатыларның өнчү-хөреңгиге өрелери өскен. Август 1-ниң хүнүнге санаан 329,2 млн рубль үндүрүгнүң 126,8 млн төлеттинмейн арткан. Өрениң эң хөй кезии – 68,2 млн рубли – регион бюджединче бүрүнү-биле кирер транспорт үндүрүү болур. Арткан 58,6 млн – муниципалдыг казнага артар чер болгаш транспорт үндүрүглери.
Республиканың Баштыңы шалыпчы айның хемчеглерин деткээн. Муниципалдыг албан хаакчылар болгаш үндүрүг ажылдакчыларындан тургустунган ажылчын бөлүктер өреге аайы-биле өрелиг кижилерни эргиир. Олар бүдүрүлгелер болгаш организацияларга чедип, ажыл берикчилерин үндүрүг өрелерин эвээжедир ажылче хаара тудар.
Үндүрүг албаннарының көжүп чоруур офистерин – өрелиг кижиге арга-сүмени кадып, төлевир документилерин долдурар чогуур медээлер баазалыг компьютерлер-биле чепсеглээр. Ол ышкаш ГАИ постуларынга база өрелиг улустар-биле ажылдаар.
Владислав Ховалыг октябрь 25-ке чедир шалыпчы айның түңнелдерин киирер даалганы берген.
/ Бистиң корр.
«Шын» №72 2024 чылдың сентябрь 21