«ТЫВА ЧОННУҢ ЧОРГААРАЛЫ» деп чаа республика шаңналының бир дугаар төлептиг болгаш ховар кижилерниң санынче делегейге билдингир «Хүн-Хүртү» бөлүү болгаш Тываның алдарлыг артизи, Улустуң хөөмейжизи Андрей Монгуш кирген.
Эрткен чылын Республика хүнүнде шаңналды тыпсып турар үеде Тывадан дашкаар гастрольдап турган болгаш сураглыг хөгжүмчүлер февраль 20-де Шагаа уткуй шаңналын алган. Алдын-мөңгүнден шуткаан кызыл үнелиг даштар каастаан сылдыстыг шаңналды баштай-ла Россияның Маадыры Сергей Шойгуга, Улустуң хөөмейжизи Коңгар-оол Ондарга (мөчээн соонда) болгаш билдингир күрүне ажылдакчызы Чимит-Доржу Ондарга, культура ажылдакчызы Татьяна Верещагинага тывыскан.
Оон ангыда, «ТЫВАНЫҢ УЛУСТУҢ ХӨӨМЕЙЖИЗИ» деп хүндүлүг атка тыва улустуң аас чогаалынга үндезилеттинип тургустунган «Тыва» бөлүүнүң ыраажызы Шончалай Оюн-ооловна Чооду-Ооржак төлептиг болган.
Тыва Республиканың «ШЫЛГАРАҢГАЙ КҮШ-АЖЫЛ ДЭЭШ» медалын хөй чылдар дургузунда тыва чогаалды сайзырадып, аныяк чогаалчыларны деткип чоруур Тываның улустуң чогаалчызы Эдуард Баирович Мижитке тывыскан.
#Шын