Россияның Камгалал яамызының дээди өөредилге черлеринге 200 ажыг олутту Тывага тускайлаан. Бо чылдың июнь 1-ниң көргүзүглери-биле, республиканың шериг комиссариаттарынче чурттуң шериг дээди өөредилге черлеринче дужаар күзелдиг абитуриентилерден 118 билдириишкин кирген. Оларның аразында 56 кижиниң хууда документилерин чыып тургускан.
Новосибирскиниң дээди шериг командылал училищезиниң комиссиязы Тываның шериг комиссариады-биле кады РФ-тиң Камгалал яамызының шупту дээди өөредилге черлеринче шилилгени чорудар. Кызылга ук комиссия июнь 16-дан июнь 20-ге чедир ажылдаар.
Шылгалдаларны шериг өөредилге черлеринге боду чеде бергеш дужаар кижилерден аңгыда, комиссия дээди өөредилге черлеринче баш бурунгаар шылгалдаларны Кызылга дужаап болур арганы берип турар. Өске регионнарже үнүүшкүн кылыр доозукчулар:
- Кызылдың президентиниң кадет училищезиниң кижизиттирикчилери;
- Санкт-Петербургта шериг-эмчи академиязынче кирер күзелдиглер;
- Штеменко аттыг Краснодарның дээди шериг училищезинче документилерин чоруткан доозукчулар;
- Национал гвардияның шериг институдунче документилерин чоруткан абитуриентилер;
- Санкт-Петербургта Можайск аттыг шериг-космиктиг академиязынче кордакчылар;
- А. Серов аттыг Краснодарның дээди авиация училищезинче дужаар күзелдиглер;
- далай болгаш авиация талазы-биле дээди өөредилге черлеринче кирер кижилер. Ужудукчу дээди өөредилге черлеринче кирер доозукчулар эмчи шинчилгезин эртер.
Шериг дээди өөредилге черлеринче дужаарының дугайында медээни РФ-тиң Камгалал яамызының сайтызындан https://ens.mil.ru/ база Тываның шериг комиссариадының сайтызындан https://rtyva.ru/content/2754/ көрүп болур. Билдириишкин киирген абитуриентилер июнь 10-га чедир документилерин чыып доозар ужурлуг. Бир эвес июнь 20 соонда дужаар болза, институтка баргаш, документилерни дужаар ужурга таваржыр.
Бистиң корр.
Чурукту интернет четкизинден хоолгалаан.
«Шын» №22 2025 чылдың июнь 12