Чуртка 2023 чылдың күскү шериг келдиртилгези доозулган. Октябрь 1-ден декабрь 31-ге чедир алды чүс ажыг аныяк оолдар республиканың шериг комиссариадының чыылда пунктузундан шериг албанын эрттирери-биле аъттаныпкан. Шеригже келдирткен оолдарның чаңгызы-даа шериг хүлээлгезинден ойталавааны республикага күскү шериг келдиртилгезиниң хемчеглерин чүс хууга күүседир таарымчалыг байдалды тургускан.
Шеригже аъттанып турар аныяк оолдарның шериг хептерин, хууда гигиена херекселдерин, орукка чиир аъш-чем аймаан долузу-биле хандырып берген. Оон аӊгыда, келир үениң Ада-чурттуң камгалакчылары болур аныяк оолдар “Мир” национал төлевир системазының банк карталарын, хууда электроннуг карталарны база МТС соталыг операторнуӊ “Аваңче долга!” деп акциялыг кызыгаар чок, халас сим-карталарны алганнар.
Шеригже келдирткеннерни Мурнуу, Барыын, Төп, Чөөн шериг округтарның шериг кезектеринче хувааган болгаш олар шериг-далай флодунга, шериг-космиктиг күштеринге, стратегтиг угланыышкынныг ракета шериинге, Росгвардияга, агаар-десант шериинге, далай чадаг шериинге болгаш Россия Федерациязының өске-даа чадаг шериг кезектеринге шериг албан-хүлээлгезин эрттирерлер.
Россияның ДОСААФ-тың регионалдыг салбырын дооскан курсантыларга тускай эргени берген болгаш олар “С” чергениң чолаачылар курузун чедиишкинниг дооскан соонда, боттарының күзели-биле шериг кезээн, шериг албанын эрттирер черин шилип алыр эргелиг.
Бо чылын шеригже келдирткеннерниң эртем-билииниң деңнели, шынары бедээнин демдеглеп турар. Оларның 65 хуузу дээди, дооспаан дээди болгаш ортумак профессионал эртемниг болуп турар.
Аныяктарны шеригже үдеп тура, республиканың шериг комиссары Демир-оол Артына келир үениң дайынчыларынга чоок улузу-биле үргүлчү харылзааны тудуп турарын сагындырып, республиканың алдар-адын бедик деңнелге тударын чагып чугаалаан.
Тыва Республиканың Шериг комиссариады.
Чуруктар шериг комиссариадының архивинден алган.
«Шын» №5 2024 чылдың январь 24