Республикада бүгү эмнелге албан черлеринде тускай шериг операциязының киржикчилеринге эмчи үделгезин чорудары-биле, «ногаан коридорну» тургускан. Эрткен чылын Тываның Баштыңы Владислав Ховалыг шериг албанныгларга, ылаңгыя ТШО-нуң эки турачыларынга «ногаан коридорну» тургузарын Кадык камгалал яамызынга дааскан.
Бо хүнде хоорайның поликлиникаларында база кожууннар аразының эмнелге төптеринде, кожууннарның төп эмнелгелеринде эмчи дузазы көргүзер ажылдар чоруп турар. Эмчи дузазы хереглээн шериг албанныглар кандыг-даа эмнелгеге баарга, аңаа дузаны бирги ээлчегде көргүзер ужурлуг.
Республиканың 2 дугаар эмнелгезинде шериг албанныгларга бирги эмчи хүлээшкинин кылгаш, тускай специалистер шинчилгени чорудуп турар. Ында хүндүскү стационар бар, аңаа дүн-хүн чок эмнээшкин алыр арга база бар.
Аарыы берге байдалдыг азы балыгланыышкын, кемдээшкинниг шериглерни Республиканың 1 дугаар эмнелгезиниң реабилитация салбырынче чорудар. Ында аарыг кижини янзы-бүрү кемдээшкин соонда катап тургустунарынга дузалап турар. Реабилитация салбырында чогуур эмчи специалистери ажылдап турар, эргежок чугула дериг-херексел, техника шупту бар.
Чиик кемдээшкинниг шериглерни катап тургустунарынга реабилитация салбырының баазазында, Кызылдың Бай-Хаакская кудумчузунда чаа поликлиникада эмчи дузазын көргүзүп турар.
Эмнелге албан черлеринден аңгыда, «Серебрянка» санаторлуг-профилакторийде база ТШО-нуң киржикчилеринге реабилитация дузазын көргүзүп турар. Аңаа шериглер хүндүскү эмнээшкинни база ап болур. Эмнээшкинни хүндүс алгаш, кежээ чана бээр аргалыг.
Тываның Кадык камгалал яамызының 2023 чылдың март айның көргүзүү-биле алырга, 399 ТШО киржикчилери эмчи дузазын алган, «Серебрянка» санаторийже 88 шериг албанныгларны, ооң иштинде 14 кижи оларның өг-бүлелериниң кежигүннерин, реабилитация эртип алыр кылдыр чоруткан.
/ А. СОЯН белеткээн.
"Шын" №33 2023 чылдың май 6
4Оценили 4 человекаПоказать список поделившихся