Шевер холдуг мастер Чиӊгис

Кызылдыӊ солагай талакы эрикте дачаларында идик даараар, дүлгүүр кылыр чаа мастерская ажыттынган.

Ооӊ ээзи Чиӊгис Биче-оол – амыдыралынга ынак, ажылынга кызымак кижилерниӊ бирээзи.

Чиӊгис хол-биле кылыр ус-шевер ажылдарны сонуургаар. Ынчангаш бодунуӊ каңнакчы мергежилиниӊ аайы-биле эвес, а идик септээр, дүлгүүр кылыр хуу сайгарлыкчы мастерниӊ дузалакчызы болуп ажылдап эгелээн. Ине-хендир-биле дааранырынга баштай чевен турган. Каш чыл дургузунда идик септээр, ону улдуруп даараар уран мергежилди шыырак өөренип алган соонда, ол бодунуӊ хуу ажылын ажыдып алыр деп шиитпирлээн.

Кызылдыӊ Чонну ажылга хаара тудар төвүнге чеде бергеш, дуза дилээн. Аныяк мастерниӊ эчис күзелин деткип, «Социал керээ» программазынга киржирин сүмелээн.

Өөнүӊ ишти-биле кады дөрт ажы-төлүн азырап өстүрбүшаан, боду хуу сайгарлыкчы ажыл-херээ-биле ажылдаар сорулгалыг Чеди-Хөл чурттуг 33 харлыг аныяк оолду Кызыл хоорайныӊ чагыргазы деткээн. Солагай талакы эриктиӊ дачаларыныӊ 5 дугаар доктаамыныӊ чоогунга мастерская кылгаш, Чиӊгис-биле социал керээ чарып алган.

Новосибирск хоорайже ол боду баргаш, дарааныр машина, демир чонар станок, шивегей дээш өске-даа дериг-херекселдерни шилип алган.
Чаа мастерская ажылдай бээрге, дачаныӊ чурттакчылары аажок өөрээн. Идикти-даа, дүлгүүрнү-даа саат чокка кылып бээр шевер мастери бар. Чиӊгис төрүмелинден үнү чок болганындан улус-биле чүгле саазынга бижип тургаш харылзажыр. Соок кыш дүшкенде, мастерскаяга келир улус хөй апарган-даа болза, ол чааскаан четтигип турар.

Келир үеде ооӊ ажылдаар черин улгаттырар, ажылчыннарны немеп бээр дээрзин Кызыл хоорай чагыргазы дыӊнадып турар.

Р. ДЕМЧИК белеткээн.