Май 26-да Тываның школаларынга 10400 ажыг школачыга сөөлгү коңга байырлалы болган. Тываның Баштыңы Владислав Ховалыг хоорайжыткан Каа-Хем суурда «Чедиишкинниң девискээри» деп аттыг 3 дугаар школаның доозукчуларынга байырын чедирген. Доозукчуларга байыр чедириишкинин ол бодунуң МАХ каналынга бижээн.
Каа-Хемниң 3 дугаар школазынга регионнуң удуртукчузунга экскурсияны эрттирген. Чаа өөредилге албан чери эрткен чылын сентябрь 1-де ажыттынган. Дооступ турар өөредилге чылында ук школада 1100 школачы өөренип турар. Школаның башкыларының хөй кезии дээди болгаш бирги категорияның башкылары, 4-ү «Россия Федерациязының ниити билиг өөредилгезиниң хүндүлүг ажылдакчызы», 2 башкы – «Күш-культура болгаш спорттуң тергиини» аттың эдилекчилери.
3 дугаар школада физика, география, химия, биология, информатика кабинеттери ажылдап турар. Ол ышкаш ийи улуг спорт зал, 320 олуттуг делгем хуралдаар зал база бар. Столоваязы амгы үениң дериг-херексели база техниказы-биле дериттинген.
Салым-чаяанныг уругларны деткиир, сайзырадыр болгаш илередиринге шупту байдалды школада тургускан. «Чедиишкинниң девискээри» школаның өөреникчилери муниципалдыг болгаш регионалдыг янзы-бүрү мөөрейлерниң болгаш фестивальдарның тиилекчилери.
Школаны ажыткан хүнден тура «Чылдың башкызы-2025» профессионал мергежилдерниң регионалдыг чадазының база «Чылдың башкызы-2026» Российжи чадазының тиилекчизи Айдаш Хертек удуртуп турар.
Школа 1 алдын база 4 мөңгүн медальдыг доозукчуларны бир дугаар үдеп турар.
Владислав Ховалыг доозукчуларга шылгалдаларны чедиишкинниг дужаарын база күзелдерин боттандырарын видео-байыр чедириишкининде чугаалаан. Республиканың удуртукчузу доозукчуларга төрээн республиказы оларны кезээде манап турар дээрзин сагындырган.
«Шылгалдаларга чедиишкиннерни, ол ышкаш боттарының изиг күзелдерин боттандырарынга шиитпирлиг болурун күзедим. Олар күзелдерин албан чедип алыр дээрзинге бүзүрээр мен!» — деп, Владислав Ховалыг каналынга бижээн.
Тываның Баштыңы школаларга күрүне шылгалдаларының чорудуун болур-чогууру-биле хайгаараарын хандырар кылдыр Өөредилге яамызынга болгаш муниципалитеттерниң удуртукчуларынга дааскан.
Бистиң корр.
Чиңгис СААЯНЫҢ тырттырган чуруктары.
“Шын” №20 2026 чылдың май 28
"Шын" солуннуң МАХ-каналынга каттыжыңар: max.ru/join/egenQ...