Тускай шериг операциязының киржикчилериниң 140 ажы-төлүн кожавыс Хакас Республикада Россияның Кадык камгалал яамызының «Шира хөл» деп бичии уруглар санаторийинче кадыын быжыктырып чоруткан. Эмчи көргүзүглери ёзугаар республиканың шупту кожууннарындан болгаш Кызыл, Ак-Довурак хоорайлардан 7 хардан 15 харга чедир назы четпээннер курорт-санаторийге эмнээшкинни эртер.
2023 чылдан бээр бо деткимче хемчег-биле ТШО киржикчилериниң 837 ажы-төлү хаара туттунган. Чүгле эрткен 2025 чылда бо категорияның 376 назы четпээннеринге курорт-санаторийге эмнээшкинни чоруткан.
ТШО киржикчилериниң ажы-төлүнүң эмнээшкини болгаш кадыкшылын быжыктырары Россияның Кадык камгалал яамызының бичии уруглар санаторийлеринде база Красноярск крайның Социал политика яамызының «Тесь» деп кадыкшыдылга төвүнде чоруп турар. Тываның уругларының хөй кезии Россияның Кадык камгалал яамызының “Шира хөл”, “Белокуриха” санаторийлеринге, “Тесь” кадыкшыдылга төвүнге кадыын быжыглаан.
Республиканың Кадык камгалал яамызының демдеглээни-биле, чурттап турар черинде диспансер учёдунда турар хоочураан аарыгларлыг назы четпээннерни бүдүн чыл дургузунда Россияның Кадык камгалал яамызының курорт-санаторий албан черлеринче чорудуп турар. Путёвканы алыр дизе, ада-иелер азы хоойлу ёзугаар төлээлер уругнуң быжыглаттынган тус чериниң педиатр эмчизи-биле харылзажып, уругга путёвка-биле хандырарын дилээн билдириишкинни бижиир, аңаа уругнуң хууда документилериниң хоолгаларын, ол ышкаш ТШО-га ада-иезиниң киржилгезин бадыткаан документизиниң хоолгазын база кожуп алыр ужурлуг.
Ч. МОНГУШ.
ТР-ниң Чазааның парлалга албанының медээзи болгаш чуруу.
“Шын” №29 2025 чылдың июль 31