Россия Федерациязының Тыва Республика талазы-биле Истелге комитединиң онза чугула херектер истээр килдизиниң истекчизиниң чыгган бадыткалдарын шын деп көргеш, Кызыл хоорайның бир өөредилге чериниң 63 харлыг эргиде директорунга хамаарыштыр шииткел үндүреринге шынзыдылга материалдарын четчир деп санаан. Ону РФ-тиң Кеземче хоойлузунуң 293 чүүлүнде (салгаа чорук, өскээр чугаалаарга, албан-дужаалдыг кижиниң бодунуң хүлээлгелерин ээ-харыысалгалыг күүсетпээнинден хамаатыларның эрге-ажыктарын хажытканы, оваарымча чок болганы-биле кижиниң өлүмүн болдурганы) буруудаткан.
Истелгениң догааштырыы-биле алырга, 2022 чылдың сентябрьда 8.00 шак үезинде школа-интернаттың назы четпээн кижизиттирикчилери интернаттың девискээринден үнерин чөпшээрээрин дилээннер.
Буруудаттырып турар кижи оларга быжыглаан кижизиттирикчилерни хайгаарал чок арттырып болбазын база назы четпээннерни даштыгаар үндүрери хоруглуг дээрзин билир турган. Ооң бетинде эзирик кижизиттирикчилер кижизидикчи башкы-биле чөңгээлежип, бижек көргүзүп, кыжанып тургаш, интернаттан кара туразында үнүп чоруй баргаш, ооң девискээриниң даштынга арагалаарын уламчылаан. Назы четпээннер полицияның профилактиктиг учедунга турган, ол ышкаш кайы-хамаанчок эзиртир суксун ижери дээш наркологтуң учедунга база турган. Оларның бирээзи когараан кижиниң кадыкшылынга аар хора чедиргени дээш шенелдеге шииттирген турган. Ол-ла хүннүң 16.00 шак үезинде эзирик оолдар баш бурунгаар сүлчээлежип алгаш, ол-ла интернаттың 18 харлыг доозукчузун каржызы-биле өлүргеннер.
Назы четпээннерни буруудадып турар кеземче херээн, истелгениң түңнелдерин Россия Федерациязының Истелге комитединиң даргазының даалгазы-биле ук албан чериниң төп аппарады хыналдага алган турган.
Судтуң шииткели-биле буруудаттырып турар кижини хосталгазын казып шииткен. Ооң ийи чылын шенелдеге эрттирер.
Россияның Истелге комитединиң Тывада истелге эргелелиниң
медээлеринден.
«Шын» №26 2024 чылдың апрель 6