Сүт-Хөл кожууннуң Алдан-Маадырда ниити билиглерниң эге школазының оран-савазы ыраккы 1973 чылда туттунган. Оон бээр капиталдыг септелге аңаа чоруттунмайн турган. Бо чылын “Ниити билигниң школа системаларын чаартыры” федералдыг программа-биле эргижирээн оран-саваны бүрүнү-биле септеп, чаартыр арга тургустунган.
Эге школаның оран-савазының септелгезин “Депшилге” КХН-ниң хүлээникчи организациязы бо чылдың апрель айда эгелээн. Уруг-дарыгның эртем-билиг чедип алыр буянныг бажыңын чаартыр ажылга ниитизи-биле 20-30 ажылчын хаара туттунган. Оларга немей тус черниң чурттакчылары база идепкейлиг киржип турар. Бо хүннерде изиг-соок суглуг, оолдар, уругларга аңгылай кылган арыгланыр өрээлдерлиг, чаагайжыды кылган школаның септелгези барык дооступ турар, чүгле чырык киирер ажылдар арткан.
“Чаарттынган школаны август 4-те хүлээп алыр комиссияга дужаар бис” – деп, школаның ажыл-агый эргелекчизи (завхоз) Айдамир Ондар дыңнаткан.