Бо хүннерде Шагаан-Арыг хоорайда 1 дугаар ортумак ниити билиг школазында улуг септелге ажылдары кидин түлүк. «Көдээ девискээрлерниң комплекстиг хөгжүлдези» федералдыг программаны күүседип, хоорайның улуг өөредилге черлериниң бирээзиниң оран-савазын чаартып турар. Тываның Баштыңы Владислав Ховалыг республиканың кожууннарында инфраструктура айтырыгларын дарый шиитпирлээринге, социал объектилерни тударынга болгаш септээринге улуг деткимчени берип турар деп демдеглээн.
Школага септелге ажылдары өөредилге чорудуунга кандыг-даа доктар чокка апрель 1-де эгелээн: өөреникчилерни хоорайның өске өөредилге организацияларынче түр када көжүрген. Школаның дээвиирин, шалазын, соңгаларын болгаш эжиктерин бүрүнү-биле чаартыр, ол ышкаш эргижирээн чылыдылга, суг хандырылга болгаш суг дамчыдар системаларны солуур дээш тудугжуларның ажылдары-ла хөй. Оон аңгыда, школаның шөлдерин ажыктыг ажыглаар дээш, эде чаартылгаларны чорудар.
Чаарттынган школага чаа эт-септи болгаш өөредилге дериг-херекселдерин садары, ол ышкаш спортчу шөлдү тудуп, долгандыр шөлдү чаагайжыдары көрдүнген. Бо хүнде чамдык эрги тудугларын септеп, даштын чаартып эгелээн.
Федералдыг бюджеттен 192,1 сая рубльди Шагаан-Арыг школазының чаартылгазынче тускайлаан. 2025 чылдың төнчүзүнде ажылдар доостур ужурлуг.
2025 чылда «Көдээ черлерниң комплекстиг хөгжүлдези» программаның күүселдези-биле Тывага 22 төлевилелди шупту 693087,64 муң рубльге боттандырар. «Көдээ суурларның амгы хевири» төлевилелдиң күүселдези-биле Улуг-Хем кожууннуң Чодураа суурда 176 олуттуг школа тудуу доозулгалак, Бай-Хаак суурда 250 олуттуг клубту чедир тудуп турар, Шагаан-Арыгның Малчын кудумчузунда суг хандырылга четкизин эде чаартып, уругларга 150 олуттуг хөгжүм школазын тудары планнаттынган.
«Көдээ черлерниң чаагайжыдылгазы» төлевилел-биле Кызыл кожууннуң Сукпак суурда уруглар ойнаар шөлдү, Бай-Тайга кожууннуң Ээр-Хавак суурда универсалдыг спортчу шөлдү, Тес-Хем кожууннуң Самагалдайда роллер-скейт паркты, Өвүрнүң Хандагайты девискээринде «Россия–Тыва» тураскаал чанын чаагайжыдар.
Программа боттандырылгазы-биле ийи автомобиль участоктарын: Эрзин кожууннуң Булуң-Бажы суурже кирер оруктуң база ол-ла суурда Галина Доваатор кудумчузунуң агар септелгезин кылыр. Оон аңгыда, он өг-бүлениң чурттаар байдалын экижидер.
Тываның Баштыңы көдээ чурттакчыларның амыдырал-чуртталгазын эде чаартыр болгаш экижидеринче угланган федералдыг программага муниципалдыг эрге-чагырганың идепкейлиг киржилгези чугула базым-дыр деп демдеглээн.
А. МОНГУШ.
Чурукту ТР-ниң Чазааның парлалга албанындан алган.
“Шын” №20 2025 чылдың май 29