Чыл санында чаа өөредилге чылы эгелээр мурнунда, чаңчыл болган «Школаже чыгдынарынга дузала!» деп ачы-буян акциязы август 10-да республиканың девискээринде эгелээн. Ол дугайында Тыва Республиканың Өөредилге яамызы дыңнаткан.
Бо акцияны хөй ажы-төлдүг болгаш амыдыралы берге байдалдыг өг-бүлелерниң ажы-төлүнге школаже белеткениринге дузалажыр сорулгалыг эрттирип турар. Акция сентябрь 20-ге чедир уламчылаар.
Ук хемчегге чылдың-на республиканың идепкейлиг хамаатылары, хуу сайгарлыкчылары база албан-организациялары амыдыралы берге болгаш хөй ажы-төлдүг өг-бүлелерниң барык 900 школа назылыг ажы-төлүнге дузалап турар.
Ачы-дуза акциязынга киржир күзелдиглерни дараазында адресте хүлээп турар: Кызыл хоорай, Московская кудумчузу, бажың 44, 13 дугаар кабинет, телефон +7(39422)21548, ГБОУДО РТ «РЦРДО» баазазында.
А ол ышкаш идепкейлиг чурттакчыларның дузазын республиканың кожууннарында муниципалдыг тургузугларның өөредилге эргелелдеринде ажыттынган пунктуларда хүлээп турар.