Штаб ажыттынган.

Долу эвес мобилизация айтырыглары-биле тускай штаб ажылдап турар

Тываның Баштыңы Владислав Ховалыг 2022 чылдың сентябрь 27-де тыва журналистер-биле эрттиргени парлалга конференциязынга Тывада долу эвес мобилизацияны чорудуп турарынга хамаарышкан айтырыгларже улуг кичээнгейни угландырып турарын дыңнаткан:

- Россияның Президентизиниң Чарлыы-биле долу эвес мобилизацияны Тывага чорударының оперативтиг штавын тургустувус. Шупту чүве ындыг бөдүүн эвес, нарын айтырыглар хөй болду. Бо үеге дээр мобилизация деп сөстүң алыс утказы безин уттундурган турган болгай. Сөөлгү катап мобилизацияны сезен бир чыл бурунгаар чорудуп турган. Ынчангаш хөй-ле чүүлдер уттундурган дээрзи тодаргай – деп, Владислав Ховалыг чугаалаан. – 55 дугаар бригадада мобилизастаан хамаатылар-биле дүүн ужураштым. Мобилизация боорун кижилер манавайн турган, оларны хенертен келдиртипкен болгай. Ооң-биле холбаштыр айтырыглар хөйү-биле тургустунуп келген. Кижилер кыжын одаар хөмүрүн дүжүрүп албаан, ыяш чарып четтикпээн, электри чырыының өртээн төлевээн... “Силерни чүү дүвүредип турарыл?” деп айтырарымга, оолдарның харыыларынга көдүрлүп келген айтырыгларның чүгле чамдыызы бо-дур. Ынчангаш Чазак деңнелинде бо ажылды уштап-башкарар штабты тургускан, ооң удуртукчузу Тываның күш-ажыл болгаш социал хөгжүлде сайыды Э.Ф. Санданны томуйладым.