Бөгүн, ноябрь 8-те, Ада-чурттуң Улуг дайынының киржикчилери, Тываның орус оолдары — Шумов алышкыларга тураскаалдың байырлыг ажыдыышкыны болган. Улуг тураскаалды найысылалдың мурнуу талазында, 17 дугаар школаның чанында, паркта шөлде тургускан.
Байырлыг ажыдыышкынга Тываның Баштыңы Владислав Ховалыг сөс алгаш, Улуг Тиилелгениң 80 чылдаан оюнда база Ада-чурт камгалакчызының чылында сураглыг Шумов алышкыларның адын мөңгежиткен тураскаал ажыдыышкыны шуптувуска төөгүлүг хүн болур дээрзин демдеглээн.
«Олар фронтуже Тыва Арат Республикадан эки тура-биле чорааш, езулуг орус солдаттың күжүн болгаш эрес-дидим чоруун көргүскеннер. Шумовтарның улуг төрел бөлүү, сибирь казактарының салгалдары, ада-чурт дайынынче фашизмге удур бүдүн рота дайынчыларын чоруткан. Ийи метр дурт-сынныг, ёзулуг орус маадырлар — Иван, Лука, Авксентий, Семён, Василий болгаш Александр. Алышкыларның миномёттуг халдаашкыны Ленинград фронтузунуң ёзулуг төөгүзү болган» — деп, Тываның Баштыңы демдеглээн.
Шумовтарның адын мөңгежидип тураскаал тургузар дээн эгелээшкинни РФ-тиң Президент Администрациязы болгаш Россияның шериг-төөгү ниитилели деткээн. Тураскаалдың тургузукчузу Суриков аттыг Москваның уран чурулга институдунуң доозукчузу Виталий Шанов.
(Бо дугайында тодаргай чүүлдү «Шын» солуннуң дараазында үндүрүлгезинден номчуур силер).
Ада ТЮЛЮШТУҢ тырттырган чуруктары.