«Социал хөмүр-даш» губернатор төлевилелдиң киржикчилери хөй ажы-төлдүг өг-бүлелерни хөмүр-даш-биле октябрь айның төнчүзүнге чедир шуптузун хандырар даалганы «социал хөмүр-даш» дээш харыысалгалыг албан черлери Күш-ажыл болгаш социал политика база Одаар чүүл болгаш энергетика яамыларның удуртукчуларынга Тываның Баштыңы берген.
Социал хөмүр-дашты алыр хөй ажы-төлдүг өг-бүлелерге бо одаар чүүлдү сентябрь 16-да сөөртүп аппарып эгелээн. Ону «Транспорт ачы-дузазы болгаш төлевилел» күрүнениң унитарлыг бүдүрүлгези боттандырып турар. Бо бүдүрүлгениң ажылында четпестерге хамаарыштыр сагындырыглар Владислав Ховалыгның талазындан мурнуку үеде турган. «Схема тургустунган, хөмүр-дашты өг-бүле бүрүзүнге кандыг-даа хожудаашкын чокка сөөртүп чедирерин даандырдым, ажылды октябрь төнчүзүнде доозар херек» – деп, Тываның Баштыңы социал четкилерде бодунуң блогунга бижээн.
Чоокку хүннерге чедир хөй ажы-төлдүг 169 өг-бүле 238 тонна хөмүр-дашты алган. 2024–2025 чылдарның кышкы одалга сезонунда 2 791 хөй ажы-төлдүг, 65 өг-бүле одаар ыяш-биле хандыртынган болур ужурлуг. Ырак-узак кожууннар Тожу биле Тере-Хөлге одаар ыяшты сөөртүп чедирер талазы-биле дугуржулгаларны транспорт ээлери-биле чарар ажыл чоруп турар.
2024–2025 чылдың кыжынында чединмес социал байдалдыг болгаш 18 хар четпээн 4-тен хөй ажы-төлдүг өг-бүлелерни одаар чүүл-биле хандырарынга 12 242 700 рубль акшаны республиканың бюджединден тускайлап үндүрген. 2856 өг-бүле одаар чүүлдү «Социал хөмүр-даш» программа шугуму-биле алыр. Оларның аразындан 2791 өг-бүлеге хөмүр-дашты, 65 өг-бүлеге одаар ыяшты бээр. Социал хөмүр-дашты алыр өг-бүлелерлиг 114 суурларга хөмүр-дашты сөөртүп чедирер.
Эң хөй социал хөмүр-дашты Чөөн-Хемчик кожуунга сөөртүп чедирер. Бо кожууннуң 12 суурунда 425 өг-бүле социал хөмүр-дашты алыр. Бир өг-бүлеге 2 тонна деп чижеглеп санап үндүрерге, бо кожуунга 850 тонна ажыг социал хөмүр-дашты сөөртүп чедирер. Хөмүр эвээш эвес, ону сөөртүп чедирериниң чарыгдалдары база бар.
Бистиң корр.
Чурукту интернеттен алган.
“Шын” №76 2024 чылдың октябрь 5