Тывага ойнаар аттракционнарының техниктиг байдалын теххайгааралдың регионалдыг албаны хынаар
2023 чылдан тура аттракционнарның (янзы-бүрү оюннарның) үрелик азы үрелик эвезин техниктиг хайгааралдың регионалдыг албаннары хынаар апарган. Ындыг доктаалдың төлевилелин Тываның Чазаа деткээн. Амдыгаа чедир ойнаар дериглерниң болгаш механизмнерниң айыыл чок чоруун кым-даа орта хынавайн турган.
2019 чылда федералдыг эрге-чагыргалар аттракционнарның ажыл-чорудулгазын чурумчудуп, оларның техниктиг байдалынга болгаш ажыглалынга чаңгыс аай негелделерни тургускан. Аттракционнарның ээлери ук негелделерни сагып турар бе дээрзин хайгаараар бүрүн эргелерни регионнарның эргезинче дамчыткан.
Бо хоойлу төлевилелин саналдап киирген ТР-ниң Көдээ ажыл-агый болгаш аъш-чем яамызында күрүнениң техниктиг хайгааралын чорудар килдистиң специалистериниң медеглээни-биле алырга, ындыг хайгаарал күртеххайгааралдың учедунга барык чок турган. Бүдүн республикада ажылдап турар аттракционнарның саны 100 турбуже, учетта чүгле үш аттракцион бүрүткеттинген.
Бо хоойлу хүлээп алдынары билек, шураар батуттарның, чайганыыштарның болгаш өске-даа ойнаар дериглерниң ээлери оларны күртеххайгааралдың органнарынга бүрүткедир хүлээлгелиг. Чылда бир катап оларның техниктиг байдалын, ажыглаар чурумун сагып турарынга хыналданы эрттирер.
Хоойлу төлевилелиниң ажылдап кылыкчыларының тайылбырлап турары-биле алырга, ол бүгү чүнүң-даа мурнунда аттракционнарга ойнап кээп турар ажы-төлдүң айыыл чок чоруун хандырары-биле холбашкан. Чаяан болуп, аттракционнарга кемдеп, когараар чаңгыс-даа таварылга Тывага бүрүткеттинмээн.
/ А.ХЕРТЕК белеткээн.
Чуруктарны интернет четкизинден алган.
#Чывачазак #Тыва #Техниктигхайгааралдыңрегионалдыгалбаны #Шынсолун #Көдээажыл_агыйболгашаъш_чемяамызы #Аттракционнар #Медээлер