Шыңгыы хыналданы чорудар

Июль 18-те Тываның Чазак бажыңынга Кызыл хоорайның болгаш Кызыл кожууннуң девискээринде чамдык черлерниң дугайында чугаалашкан.

ТР-ниң Баштыңы Владислав Ховалыг ол дугайында бодалдарын бодунуң блогунга илереткен.

«Чамдык чаңгыс чер чурттугларывыс үптекчилерниң мегезинге алзыпкаш, когараан таварылгалар хөй болуп турары хомуданчыг-дыр. Чаңгыс аай шиитпир үндүрери болдунмас. Чүге дээрге таварылга бүрүзү бодунуу-биле аңгы-аңгы. Ынчалза-даа албан-езузу-биле сагындырыгны берген турбуже, чамдык хамаатылар чөпшээрел чок черлерге чурттаар оран-сава тудары уламчылап турар. Тудуг тударынга көңгүс белен эвес черлерге меге документилер кылдырып алгаш, садып-саарып турар барымдаалар база тодараан.

Чурумга дүүшпес чүүлдер кылып, улустан эвээш эвес түңнүг акша-төгерик алган хамаатылар үүлгеткен херээн хоойлу мурнунга харыылаар апаар. Бо бүгү ак сеткилдиг эвес садыгжыларга, оларга дузалашкан азы билбээчеңнеп эрттирипкен аңгы-аңгы эрге-дужаал эдилээн даргаларга база хамааржыр.

Тыва Республиканың прокурору Сергей Дябкин бо айтырыгга хамаарыштыр дүвүрелимни долузу-биле деткиди. Ук албан черинден чамдык будулгаазынныг черлерге шыңгыы хыналданы чорударын диледивис.

Кады кылып чорудуп эгелээн ажылывысты неделя санында шүүштүрүп, полиция ажылдакчыларын, Роскурлавыр төлээлерин, муниципалитеттерни болгаш өске-даа харыысалгалыг хамаатыларны бо ажылче хаара тудар бис. ТР-ниң Чазааның Даргазының оралакчызының хүлээлгезин күүседип турар Айдыс Сынааны бо ажылга хамаарыштыр томуйладым» – деп, Владислав Ховалыг демдеглээн.

Бистиң корр.

"Шын" №54 2024 чылдың июль 20