Өөредиглиг чугаалар
Бир-ле катап чыккылама соокта бир бажыңның одаар ыяжы төнүп калган. Ачазы үнгеш, кадып өлген ыяш ужуруп алгаш келген.
Чазын ол одура хирээлеп алган ыяжының артып калган төжээнде чаш будуктар үнүп эгелээнин көрүп каан.
— Мен бо ыяшты өлген деп билдим чоп. Ынчан бо ыяштың будуктары чыккылама сооктан чарлып чаштап, дазылы өлүглени берген ышкаш турду. Ам ооң унунда амыдырал тыптып эгелээн-дир – деп чугаалангаш, оглунга чагып сургаан:
— Бо кичээндириг-дир, сактып ал. Кажан-даа кыжын ыяш ужурба. Таарымча чок үеде азы сагыш-сеткилиң берге байдалда турда, шиитпир хүлээве. Шыдамык бол, берге үелер эрте бээр. Час катап база келир деп сактып ал.
"Шын" №62 2024 чылдың август 17