Күрүнениң чаңгыс аай шылгалдалары уламчылавышаан. Июнь 16-дан 23-ке чедир курлавыр хонуктар көрдүнген. Чижээ, 11-ги класстың доозукчулары июнь 16-да географияга, литературага, хөй-ниити эртеминге болгаш физикага шылгалданы дужааган. 151 кижи тестилерни эрткен. Оларның улуг ке- зии – 109 доозукчу хөй-ниити эртемнерин шилип алган.
Май 30-де бижээн ийи кол шылгалдаларның бирээзи – орус дылдың түңнелдерин июнь 17-де чарлаан.
“80 ажыг доозукчулар орус дыл шылгалдазында тергиин түңнелдерлиг болган. Оларның хөй кезии – көдээ школаларның доозукчулары. Совет Эвилелиниң Маадыры Михаил Бухтуев аттыг Кызылдың №1 школазының доозукчузунга – Субудай Кууларга изиг байырым чедирип тур мен. Ол 100 баллга экзаменни бижээн. Орус дыл болгаш литературазының башкызы Екатерина Балчий. ЕГЭ-ниң чедиишкинниг түңнелдери Субудайга болгаш өске-даа 11-ги классчыларывыска күзээн мергежилинче болгаш дээди өөредилге черинче дужаап алырынга дузалыг дээрзинге бүзүрелдиг мен” – деп, Тываның Баштыңы Владислав Ховалыг бодунуң блогунда бижээн.
Өске шылгалдаларның түңнелдери удавас билдинер. Бир эвес түңнелдеринге таарышпас доозукчулар бар болза, ЕГЭ-ни катап дужаар немелде хүннер база көрдүнген.
«Түңнелдер амдыызында билдинмес-даа болза, доозукчуларның хөй кезии эки болурунга бүзүрелдиг. Бо шылгалдаларның түңнелдеринден күзээн университеттеринче дужаап кирери болгаш оларның келир үези чугула хамааржыр деп чүүлдү дыка эки билип турарлар” – деп, күрүнениң шылгалда комиссиязының кежигүнү Розалия Өлчей демдеглээн.
Бистиң корр.
“Шын” № 23 2025 чылдың июнь 19