Таптыг-ла 100 чыл бурунгаар, 1923 чылдың октябрь 23-те, ССРЭ-ниң Саң-хөө Улус комиссариадының чанынга күрүнениң бюджет акша-хөреңгизин дээштиг ажыглаарын хынаар Саң-хөө контроль эргелелин тургускан. 100 чыл дургузунда контроль-ревизия органнары күрүнениң бюджединиң чарыгдалын хынаар күштүг система апарган. Контроль-ревизия органнары улуг орукту эрткеш, Россияның Казначействозу чергелиг күрүнениң албан чери кылдыр быжыглаттынган.
Россия Федерациязының Саң-хөө яамызының контроль-ревизия органнарының тургустунганындан бээр 100 чыл ою-биле холбаштыр эртем-практиктиг конференция Тыва Республиканың Чазааның бажыңынга октябрь 23-те болуп эрткен. Ооң мурнуу чарыында Федералдыг казначействонуң Тыва Республика талазы-биле эргелелиниң казна албанынга шылгараан хоочуннарга болгаш ажылдакчыларга шаңналдарны тыпсырының ёзулалы болуп эрткен.
Россияның Саң-хөө яамызының контроль-ревизия органнарын тургускандан бээр 100 чылы-биле Тываның Баштыңы Владислав Ховалыг Федералдыг казначействонуң Тыва Республика талазы-биле эргелелиниң хоочуннарынга болгаш амгы үеде ажылдакчыларынга байырны чедирип, боттарының ажыл-херээнге шынчы болгаш бедик мергежилдиг чоруу дээш өөрүп четтиргенин илередип, оларның амыдырал-чуртталгазынга болгаш албан ажыл-херээнге чедиишкиннерни күзээн.
“Контроль-ревизия органнары чурттуң экономиказын башкарарының, бюджет акша-хөреңгизин чарыгдалын хынаарының кол күрүне албан чери, чүге дээрге Россияның саң-хөө эрге-ажыктарын ол камгалап турар. Ону Россия Федерациязының Президентизи Владимир Путин Россияның Саң-хөө яамызының контроль-ревизия органнарын тургускандан бээр 100 чылы-биле холбаштыр байыр чедириишкининге айыткан”— деп, Владислав Ховалыг чугаалаан.
Федералдыг казначействонуң Тыва Республика талазы-биле эргелелиниң шылгараңгай хоочуннарынга болгаш ажылдакчыларынга Тываның Баштыңы шаңналдарны тывыскан.
“Россия Федерациязының Саң-хөө яамызының контроль-ревизия органнарының тургустунганындан бээр 100 чылы” медаль-биле контроль-ревизия органнарының хоочуннары Сактаа-Сүрүнмаа Моңгуш, Алдын-оол Сат, Маргарита Салчак, Владимир Степанов болгаш Тыва Республиканың Саң-хөө болгаш бюджет хайгаарал албанының удуртукчузу Татьяна Монгуш олар шаңнатканнар.
Контроль-ревизия органнарынга хөй чылдар дургузунда ак сеткилдиг болгаш бедик үре-түңнелдиг ажылы дээш Россия Федерациязының Федералдыг хуралының Федерация чөвүлелиниң даргазының шаңналын ТР-ниң Саналга палатазының даргазы Елена Ховалыгга тывыскан.
Контроль-ревизия органнарынга хөй чылдар дургузунда төлептиг ажылы дээш Тес-Хем кожууннуң контроль-саналга албанының инспектору Сайхо Дандаага Тываның Баштыңының Өөрүп четтириишкин бижиин тывыскан.
Бедик мергежилдии, кызымак ажылы дээш Тыва Республиканың Баштыңының Хүндүлел бижиин Федералдыг казначействонуң Тыва Республика талазы-биле эргелелиниң бюджеттиң саң-хөө адырында контроль-ревизия салбырының ревизору Ирина Чалбаага, Тере-Хөл кожууннуң контроль-ревизия албанының удуртукчузу Лилия Санчыга тывыскан.
Контроль-ревизия органнарынга хөй чылдар дургузунда үре-түңнелдиг ажылы дээш “Тыва Республиканың алдарлыг ажылдакчызы” атты Аида Канданга, “Тыва Республиканың алдарлыг экономизи” атты Валентина Моңгуш, Лидия Хомушку оларга тывыскан.
Тываның Баштыңы Владислав Ховалыг шаңнатканнарга байыр чедирип, ол шаңналдар контроль-ревизия органнарын хөгжүдеринге оларның киирген улуг үлүүн бедии-биле үнелээниниң бадыткалы-дыр деп демдеглээн.
Ш. МОҢГУШ.
Буян ООРЖАКТЫҢ тырттырган чуруктары
“Шын” №81 2023 чылдың октябрь 25