«Шын» солунну чаңгыс-даа номер арттырбайн номчуп чоруур болгаш Тывада чүү болуп турарын билип олурар мен. Чоокта чаа «Шынга» эът өртээниң өзүп турарының дугайында чүүл үнген, ында сайгарлыкчыларның тайылбырынга чөпшээрешпейн тур мен. Сайгарлыкчыларны камгалап, хөөкүй малчыннарже чууй каап турары дыка шын эвес. Шын деп чүве бар бе чогум?
Чоокта чаа мээң улузум сайгарлыкчыларга инек эъдин дужаарга, арай деп-ле килограммда 160 рубльге хүлээп алдылар. Эътти чиик өртекке хүлээп алгаш, 400–500 рубльге үндүр садып турары дыка эпчок, чаржынчыг. Малчын кижи чайның изии, кыштың соогу дивейн кара дерин төп чорааш малды өстүрер. Дүнелерде безин орта удувас, малды оор-сукка алыспас дээш кадарып хонар. Малды кыштан хүр менди ажырып алыр дээш, хөй чарыгдал үндүрүп, аар өртектиг бензин, солярканы садып тургаш, мал чемин белеткеп алыр болгай. Кааң чылдарда мал чеми чегей үнгенде, аар өртектиг рулон сигенни садып алгаш, малды кыш ажырар.
Оода Тыва иштинге боттарының бүдүрген бараанының өртектерин өйлезе кандыгыл? Өскелерге хора чедирбейн, эки чүвени кылып чоруур болза, эки чүве ынчан келир, боданыңар.
Көдээ ажыл-агый яамызының дыңнадыында малчыннар эът өртээн килограммда 280–300 рубльга дужаап турар деп меге тайылбырны чүге берип турарыл?
Раиса МОНГУШ, пенсионер.
Кызыл хоорай.
"Шын" №64, 2023 чылдың август 30