Үениң сайзыралының аайы-биле чүгле Тывада эвес, а Россияда болгаш өске-даа чурттарда кижилер медээлерни колдуунда смартфоннар болгаш компьютерлер таварыштыр номчуур апарган. Саазын солун-сеткүүлдүң эки талалары хөй деп санаттынып турза-даа, амыдыралдың шапкын агымы электроннуг хевирже чая база берген. Эң-не өөрүнчүг чүүл бистиң улуг назылыгларывыс солуннуң саазын хевирин амдыгаа чедир номчуп чоруурлар.
Бо бүгүнү амгы үеде социал четкилерде албан ёзугаар бөлүктерниң бижидикчилериниң санындан көрүп болур. Чижээлээрге, “Шын” солуннуң ВКонтакте социал четкиде бөлүүнде 20 муң 679 кижи киир бижидип алган номчуп турар. А саазын хевир 2 муң 304 чагыдыкчылыг.
Оон аңгыда, саазын солун бүдүрүлгезиниң өртек-үнези база көвүдээн. Почта чарыгдалдары, типографияга солунну аңгылап, аайлаары дээш оон-даа өске чарыгдалдарны санап болур. Кожууннарже чедип чорда, база үе эртер, номчукчуга солун озалдап чедер таварылгалар база тургустуна бээр.
2025 чылдан эгелеп “Шын” солун неделяда чаңгыс катап үнүп эгелээрин дыңнадып тур бис. Хүндүлүг номчукчу, ол дээш дүвүревезиңерни диледивис. Солуннуң арыннары эвээжевейн, ол хевээр артар. “Шын” солун неделяның средада 12, а субботада 20 арын үнүп турар болза, келир чылын неделяда чаңгыс үнер солунувус 32 арынныг болур. Ынчан неделя дургузунда болган болуушкуннарны хары угда номчуп, ооң сүүзүнүн алыры кончуг эки болуп турар. Чоннуң номчуксаары сайгарылгалыг материалдар, хоочун-даа, аныяк-даа аңгы-аңгы адырларда шылгараңгай ажылдап чоруур кижилер дугайында дээш солун, номчуштуг материалдар көвүдээр. Ол ышкаш 32 арынныг солуннуң бир дугаар болгаш сөөлгү арыннарын өңнүг кылдыр үндүрерин база өөренип көрүп турар.
Социал четкиде шак ындыг материалдарны муң-муң кижилер номчуп турар. Чижээ, октябрь 16-да үнген “Даайынга” эвес — бодунга” деп күрүне деткимчезиниң дугайында аналитиктиг материалды 10 муң 116 кижи, эртемден Чүргүй-оол Михайлович Доржунуң дугайында “Маадырның адын алган Өвүр оглу” деп материалды 5 муң 837, Н. Наксыл: «Ээп кээр мен, мана, театрым!» — 11 муң 419, хууда сайгарлыкчы Кушкаш-оол Кууларның дугайында “Кыдат бараан сөөртүкчүзү” – 6 муң 970 кижи номчаан. Ол ышкаш тыва чоннуң ёзу-чаңчылдарын кадагалап арттырар сорулгалыг хемчеглер, некрологтар, хууда сайгарлыкчылар, хоочуннар, онзагай аныяктар дугайында дээш оон-даа өске материалдарны социал четкиде номчукчуларның хөйү-биле номчуп турары өөрүнчүг. Социал четки сайзырап-даа турза, саазынга парлаан солунну каш-даа чагыдыкчы номчуп турар болза, ол артар ужурлуг.
/ Бистиң корр.
«Шын» №82 2024 чылдың октябрь 26