Барыын-Хемчик кожууннуң төвү Кызыл-Мажалык сумузунуң «Чечек» уруглар сады капиталдыг септелге соонда чаштарны хүлээп эгелей берген.
«Өг-бүле» национал төлевилелдиң ачызында 140 бичии кызыл-мажалыкчылар амгы үениң дериг-херексели-биле дериттинген, тускай ойнаар шөлдерлиг, чаа үениң негелделери-биле дүүштүр септеттинген уруглар садынга кээп, эртемнерниң таваа болур, эге билиглерни алыр аргалыг апарган.
Ол ышкаш Тыва Республиканың Ак-Довурак хоорайда даг техникумунга «Аныяктар болгаш уруглар» национал төлевилелдиң деткимчези-биле беш чаа лабораторияны тургузуп, кабинеттерни болгаш мастерскаяларны чаарткан. Шак ындыг чаартылгалар студентилерниң өөредилгезинге практиктиг аргаларны тургузуп, мергежилди эки шиңгээдип алырынга дузалаар дээрзи билдингир.
ТР-ниң Баштыңы бодунуң блогунга аңаа хамаарыштыр демдеглээни:
«Өөредилге инфраструктуразын хөгжүдери – бистиң кол сорулгавыс. Өзүп орар салгалдарывыс бодунда бар талантызын, арга-шинээн төрээн черинге сайзырадып, боттандырып алзын дээш, бедик шынарлыг өөредилгени бээринге бүгү-ле байдалдарны тургузарын уламчылаар бис».
Бистиң корр.
Чиңгис СААЯНЫҢ тырттырган чуруктары.
“Шын” №44 2026 чылдың ноябрь 12
"Шын" солуннуң МАХ-каналынга каттыжыңар: max.ru/channel_shyn