Эрзин кожууннуң Мөрен сумузунуң хоочун чурттакчызы, Тыва Республиканың алдарлыг ажылдакчызы Чечекмаа Кыргысовна Садиниң октябрь 20-де төрүттүнген хүнү. Ол «Шын» солуннуң идепкейлиг бижикчизи.
«Ачам Кыргыс Килбекович Намдак партия кежигүнү, аажок шынчы кижи. Ол мени «Бижип өөрен, уруум. «Шын» солунче чүүлдерден бижип тур» — деп үргүлчү чагыыр чораан. Редакцияның кол редактору Шаравии дарга турда, штаттан дашкаар корреспондент деп атты-даа алган мен. Хоочун солунувус удавас 100 чылдаар болгай, ооң юбилейинге чедир кожуунувуста, сумувуста болуп турар онзагай солун хемчеглерни ам-даа бижиир мен» — деп, Чечекмаа Кыргысовна чугаалап турар.
Чечекмаа Кыргысовнаны ылап-ла олут орбас, чыдын чытпас, ажылгыр-кежээ хоочун деп болур. Ол – Мөрен сумузунуң хөй-ниитижи, идепкейжи хоочуннарының бирээзи. Хоочуннуң бажыңының девискээрин янзы-бүрү чечектер каастап турар. Огородунда ногаа-чимис, картофельди хөйү-биле тараан, бо чылгы дүжүдү элбек болган.
Хүндүткелдиг хоочун энеге быжыг кадыкшылды, узун назынны күзеп каалыңар.
Бистиң корр.
“Шын” №79 2023 чылдың октябрь 18