Тываже Туризм талазы-биле федералдыг агентилелдиң удуртукчузу кээр
Россияның Туризм талазы-биле федералдыг агентилелиниң удуртукчузу Зарина Догузова июль 7-де республиканың девискээринге “Сибирь каникулдары” национал турисчи төлевилелди боттандырарын хынаары-биле Тывага кээр.
Чурт иштинге туризмни сайзырадыры-биле Туризм талазы-биле федералдыг агентилел Тыва Республика, Хакасия болгаш Красноярск крайның девискээрлери-биле эртер “Сибирь каникулдары” деп чаа национал турисчи маршрутту эгелээрин шиитпирлээн турганын сагындыраалы. Маршруттуң тургустунганының кол утказы – туристерге цивилизациядан дыштанып алыр, Сибирь тайгазынче ханылап кирер болгаш бодунуң шыдамык чоруун хынаар арганы тургузуп бээри болуп турар.
Ук маршрут аайы-биле туристер Сибирьниң кижи четпес черлерин база чурттуң Президентизиниң дыштаныр черлерин сонуургап көөр аргалыг болур. Маршрутка киржир сорулгазын Хакас Республика биле Красноярск крайның туризм адырын харыылап турар эрге-чагырга органнары бадыткаан.
2022 чылдың май 14-тен 16-га чедир хүннеринде Тывага “Сибирь каникулдары” деп турнуң эксперт бөлүү кээп чораан болгаш “Алдын-Булак” этнокультурлуг комплекстиң хуралдаар залынга оларның ажылының түңнелдерин сайгарып чугаалашкан.
Зарина Догузова ажылдың кайы хире чоруп турарын боду хууда хынап көөр сорулгалыг база Тывага туризм сайзырадырының оруктарын чугаалажыры-биле республикага келир.
Бистиң корр.