«Сибирь мында» демир-орук турун таныштырган

«Сибирь мында» демир-орук маршрудунуң киржикчилери Тыва Республиканың бот-тускайлаң культуразын сонуургааннар. Сентябрь 9-тан 16-га чедир Сибирь федералдыг округтуң регионнарга таныштырылгалыг турну организастаан. Турнуң киржикчилери Омск – Новосибирск – Бийск – Томск – Новокузнецк – Абакан – Красноярск – Иркутск маршрут-биле солун экскурсияны эрткен. Туристер Сибирьниң дөмейлешпес янзызын болгаш чаражын магадап, ооң девискээрлеринде кол культурлуг болгаш бойдус тураскаалдарынга чедип, үндезин чоннарның ужур-чаңчылдары болгаш езулалдары-биле танышкан.

«Сибирь мында» демир-орук турунуң туристери Абаканга доктаап, Л.Р. Кызласов аттыг Хакасияның национал чурт-шинчилел музейинге чедип, делегейде эң хөй даш көжээлерлиг улуг коллекцияны сонуургап, Россияда эң күчүлүг ГЭС – П.С. Непорожный аттыг Саян-Шушенскоениң гидроэлектростанциязын көргеннер. Оон аңгыда, аян-чорукчуларга Тыва Республиканың культуразын сонуургаткан тускай таныштырылгада тыва хөөмейни бараалгаткан.

Демир-орук аян-чоруунга тускай шериг операциязының киржикчилериниң өг-бүлелери, пенсионерлер, волонтерлар, туроператорлар, массалыг информация чепсектериниң төлээлери база блогерлер шупту 110 кижи киришкен.

«Сибирь мында» регионнар аразының турисчи төлевилелин Сибирь федералдыг округта Россия Федерациязының Президентизиниң бүрүн эргелиг төлээзиниң аппарадының активчи киржилгези болгаш деткимчези-биле боттандырган. Бүрүн эргелиг төлээ Анатолий Серышевтиң бодалы-биле алырга, таныштырылга поездизин аъткарганы регионнар аразының харылзаазын быжыглап, эрге-чагырганың регионалдыг органнарының, туроператорларның кады ажылдажылгазының чаа арга-хевирлерин илередир. «Бо арга-дуржулга эң-не хөй аудиторияга Сибирьниң байлаан болгаш чаражын көргүзүптер шынарлыг болгаш хереглелдиг турисчи продуктуларны тургузарынга идигни бээр» – деп, А. Серышев демдеглээн.

«РЖД Тур» КХН – промотурнуң албан езузунуң туроператору. Төлевилелге стартты 2025 чылда бээри планнаттынган.

Бистиң корр.
“Шын” №73 2024 чылдың сентябрь 25