2024 чылда мал чеминиң белеткелин машина-техника-биле колдады чорудуп турар. Кожуун бүрүзүнде барык механизастанган звенолар тургустунган. Ол дээрге көдээ ажыл-агый бүдүрүлгелериниң техниктиг баазазын быжыглаар дээш, ТР-ниң Көдээ ажыл-агый яамызының сөөлгү чылдарда күжениишкинниг чорудуп келген ажылының түңнели-дир.
Улуг-Хем кожуунда Ийи-Тал сумунуң девискээринде Барлык деп черде мал ажыл-агыйлыг «Ырлыг-Булак» кызыгаарлаан харыысалгалыг ниитилел агроүлетпүр комплекизин сайзырадыр тускай программа шугуму-биле субсидия акша алгаш, МТЗ-82 марканың 2 тракторун сиген кезер, бөлер, дүрер кожуг дериг-херекселдери-биле кады садып алган. "ЛБР-Сибирь" кызыгаарлаан ниитилелдиң аар чүък машиналары садып алган техниказын сөөртүп эккеп берген. Бо чылын сигенни келир кыжын мал-маганынга четчир кылдыр белеткеп алыр арга «Ырлыг-Булакта» бар апарган.
Александр Маады – Бии-Хем кожууннуң Аржаан суурнуң чурттакчызы көдээ ажыл-агыйның арга-дуржулгалыг хоочун ажылдакчызы. Александр Маадыр-ооловичиниң өг-бүлези мал-маганны азырап өстүрүп келген. Черле ынчаш, Аржаан суурда мал азырап өстүрүп турар өг-бүлелер хөй. Олар мал чемин белеткеп алырынга бергедээшкиннерге таваржып турганнар. Оът-сиген чегей үнген каңдаашкынныг чылдарда өске девискээрлерден сиген садып алырга, ооң өртээ дыка аар.
Ол бүгүнү сайгарып көргеш, Александр Маады Аржаан сумузунга мал чеми белеткээр ажылды эгелээр деп шиитпирлээн. Бии-Хем кожууннуң чонун ажылга хаара тудар төп-биле социал керээни 2023 чылда чаргаш, алган акша-биле сиген бөлүп тырыыр кожуг машиназын садып алган. Бо чайын Александр Маадыр-оолович тус черниң чурттакчыларынга мал чеминге сиген кезип, бөлүп тырыыр ачы-дузаны чедирип турар. Ооң ачы-дузазын ажыглаар кижилер Аржаан сумуда эвээш эвес болган.
/ Ш. ЛОПСАН.
Чуруктарны социал четкилерден хоолгалаан.
“Шын” №68 2024 чылдың сентябрь 7