Тывада өскүс эрге-байдалдыг хамаатыларны чуртталга бажыңнары-биле хандырары чылдан чылче экижип турар.
Өскүс уругларны чуртталга бажың-балгады-биле хандырар федералдыг программаның акша-хөреңгизи-биле чүгле сөөлгү үш чылда 893 хамаатылар бажыңнарны азы квартираларны алган.
Өскүс болгаш ада-иезиниң азыралы чок арткан эрге-байдалдыг хамаатыларга бажыңнарны “Тыва Республикага 2021 – 2023 чылдарда хамаатыларның социал деткимчези” деп күрүне программазының “2021 – 2023 чылдарда өг-бүлениң болгаш ажы-төлдүң социал камгалалы” деп биче программазының акша-хөреңгизи-биле чорудуп турар. Чижээлээрге, Барыын-Хемчик кожууннуң төвү Кызыл-Мажалык суурда Зоя Тырышпаева биле Лесная кудумчуларында бо чылын 8, Каа-Хем кожууннуң төвү Сарыг-Сеп суурга 2022 чылда 5 бажыңны, Суг-Бажы суурнуң Салчак Допчут-оол кудумчузунга 1 бажыңны, Бии-Хем кожууннуң Туран суурга 5 бажыңны бо чылын өскүс уруглар эрге-байдалдыг кижилерге тудары көрдүнген.
Сөөлгү ийи чылда өскүс эрге-байдалдыг хамаатыларны чуртталга шөлү-биле хандырары көвүдеп эгелээн. 2022 чылда 300 кижиге бажыңнарны болгаш квартираларны берген. Ол дээрге мурнуку чылдарда байдалдан оранчок хөй.
Шаңгыр-оол Моңгуш.