2023 чылдың соңгулда кампаниязы эгелээн. Тыва Республиканың Хөй-ниити палатазы биле хөй-ниити организациялары болгаш коммерциялыг эвес каттыжылгалар аразынга Кады ажылдажылганың дугуржулгазынга атты салган. Ооң сорулгазы — Тыва Республиканың девискээринге соңгулдалар чорудуун хайгаараарынга хөй-ниити организацияларының төлээлерин киириштирери. Дугуржулгага ат салыр хемчегге республиканың 12 хөй-ниити организациязының удуртукчулары киришкен.
«Бо чылдың соңгулда кампаниязы ажык болгаш чөптүг эртсин дээш Кады ажылдажылганың дугуржулгазынга атты салып турары бо. Амгы үеде хөй-ниити хайгааракчыларының саны 207 кижи. Дугуржулгага атты салган соонда, август айның төнчүзүнге чедир хөй-ниити хайгааракчыларынга өөредилгени эрттирер бис» — деп, ТР-ниң Хөй-ниити палатазының аппарадының удуртукчузунуң оралакчызы Баян-Доржу Сат чугаалаан.
6 чыл дургузунда мындыг ажылды чорудуп турарын Баян-Доржу Сат дыңнаткан: «2017 чылдың төнчүзүнде чурттуң Президентизи В. Путин Хөй-ниити палаталары шупту деңнелдиң соңгулдаларынче хөй-ниити хайгааракчыларын чорудар эргелиг дугайында хоойлуга атты салган».
Хөй-ниити хайгааралының киржикчилеринге шупту байдалды тургузар болгаш парлалгага база электроннуг массалыг-информация чепсектеринге соңгулдаларның ажыл-чорудулгазын чырыдарын кайы-даа тала хүлээнип алган.
Ат салган хүнден тура Дугуржулга күш кирген болгаш 30 хонук эрткенде, соңгулданы түңнээн соонда, ооң хуусаазы төнер.
Россияга чаңгыс аай соңгулда хүнү 2023 чылдың сентябрь 10-да. Тывага муниципалдыг тургузугларның болгаш көдээ сумуларның Төлээлекчилер хуралдарының депутаттарын соңгуур.
А.СОЯН.
Чуруктарны Буян ООРЖАК тырттырган.
"Шын" №60, 2023 чылдың август 12