Тываның хөй-ниити палатазынга хамаатыларның соңгулда үезинде эрге-ажыктарын регион девискээринге мониторингилээр штабтың хуралы болуп эрткен.
Хурал үезинде эксперттер болгаш хөй-ниити палатазының кежигүннери чурттуң ниитилел-политиктиг амыдыралында чугула черни ээлеп турар, Россияның Президентизиниң соңгулдаларының дугайында болгаш «Бөгүн Россия» деп медээлер агентилели ассоциацияның удуртукчузу Александр Бродтуң «Үениң айтырыынга харыылавышаан: 2024 чылда РФ-тиң Президентизиниң соңгулдаларынга белеткел» «Хамаарылга чок хөй-ниити мониторинг» деп илеткелиниң дугайында чугаалашкан.
Эдерти шинчилээр база хамаатыларның соңгулда эргелериниң контролюнуң талазы-биле хөй-ниити штавының даргазы Светлана Ощепкованың чугаалап турары-биле алырга, соңгулдалар үезинде хамаатыларның эрге-ажыктарын регион девискээринге мониторингилээр хөй-ниити штаб болгаш хайгааракчыларны өөредир программа белен.
ТР-ниң Аныяк юристер эвилели болгаш Россияның юристер Ассоциациязының регионалдыг килдизиниң төлээлери ук өөредилгени эрттирер.
«Россияның соңгулдалары хоойлу езугаар болгаш амгы үениң юридиктиг стандарттарынга дүүштүр болуп эртер. Ажык чарлыг соңгулда соңгулданың шынныын болгаш бүзүрелдиин бадыткаар» – деп, Светлана Ощепкова чугаалаан.
Тывада бо хүннерде чеди соңгулда эксперти ажылдап турар. Оларның аразынче Тываның күрүне университединиң юридиктиг факультединиң 4-кү курузунуң студентизи Регина Күжүгет база кирип турар.
«Бөгүн РФ-тиң Президентизиниң соңгулдаларынга хамаарышкан илеткел-биле таныштывыс. Илеткел дыка тода болгаш билдингир болду. Эң-не чидиг айтырыгларны айыткан болду. Дыңнаанывыс чүүлдү эки деп санаар-дыр мен. Чидиг айтырыгларны аңгы демдеглеп каан-дыр. Онлайн бадылаашкын дугайында онзагайлап демдеглээн-дир. Бо чылын болур соңгулдаларга Тыва республика онлайн хевирни ажыглавас-тыр бис. Онлайн бадылаашкынның Тывага база турары күзенчиг-дир.
Бодум хуумда Госуслуги таварыштыр бадылаашкынны экизинмес мен. Бадылаашкын чажыт болур ужурлуг болгай. Госуслуги таварыштыр соңгуурга, хамааты бүрүзүнүң бодунуң хууда медээлери ында бар ышкажыл. Ынчангаш бадылаашкын чажыт эвес апаргы дег»– деп, Регина Күжүгет чугаалады.
Бо хүнге чедир РФ-тиң Президентизиниң соңгулдаларынга киржири-биле 11 хамааты кандидатуразын киирген. Оларның сези политиктиг партияларның идип үндүрген төлээлери, үжү – бодун боду идип үндүрген дээрзин январь 11-де Россияның Төп соңгулда комиссиязының даргазы Элла Памфилова комиссия хуралынга чугаалаан.
Айдың ОНДАР.
Буян ООРЖАКТЫҢ тырттырган чуруктары.