Тываның найысылалында Аныяктар ордузунга кел чыдар соңгулда хүнүнде соңгулда участоктарынга ажылдаар хөй-ниити хайгааракчыларының ээлчеглиг өөредилгези болуп эрткен.
Август 21-де Кызыл кожуундан хайгааракчылар белеткелди эрткен. Аңаа ниитизи-биле 90 хире кижи киришкен. Август 24-те база-ла аңаа 10 хайгааракчы өөредилгени эртер. Ооң мурнунда июль 20, 21 хүннеринде ол-ла черге ук өөредилге болуп эрткен. Аңаа Хөй-ниити хайгааралының хамаарышпас ассоциациязындан федералдыг эксперттер киришкен. Организаторларның дыңнадып турары-биле алырга, белеткелдиң эрткен чадаларында өөредилгени республиканың аңгы-аңгы кожууннарындан 50 хире хайгааракчы эрткен.
Өөредилге программазын Россия Федерациязының Хөй-ниити палатазы Хөй-ниити хайгааралының хамаарышпас ассоциациязы-биле кады ажылдап кылган. Өөредилге үезинде дыңнакчылар боттарының эргелерин болгаш хүлээлгелерин, ол ышкаш соңгулдаларның кол киржикчилери– участоктарның соңгулда комиссияларының кежигүннери (УСК), эрге-хоойлу камгалаар органнарның болгаш массалыг информация чепсектериниң ажылдакчылары-биле канчаар харылзажырының чурумун тодаргайы-биле билип алганнар.
Тыва Республиканың Хөй-ниити палатазының аппарадының удуртукчузу Амир Монгуштуң тайылбырлааны-биле алырга, хөй-ниити хайгааракчыларының кол сорулгазы – оларның эргелеринге хамаарыштыр болгу дег чурум үрээшкиннерин чайладырынга дузалажыры болур. Чижээ, бир эвес соңгулда участогунда хөй-ниитиниң чурум үрээшкиннери илереттинген болза, хайгааракчы кижи участоктуң соңгулда комиссиязының даргазынга дыңнадып, херек апарза, ону дүрген шиитпирлээри-биле хоойлу-дүрүм камгалаар органнар-биле харылзажыр.
"Кандыг-даа кижи хөй-ниити хайгааракчызы болуп болур. Кол-ла чүве – быжыг туруштуг болгаш бо талазы-биле билиг-мергежилдиг болуру. Шак бо өөредилгени ынчангаш чорудуп турар"– деп, Амир Монгуш демдеглээн.
Хөй-ниити хайгааракчызы, Кызылдың 17 дугаар школазының башкызы Ольга Сенникова бодунуң ээлчээнде өөредилгениң киржикчилериниң сорулгазының чугулазын онзалап демдеглээн: "Хайгааракчы кижиниң ажылы кончуг чугула деп санаар мен. Соңгуп кээп турар хамаатылар соңгулданың ажыл-чорудулгазынга бүзүреп, соңгулдалар Россия Федерациязының хоойлузунга дүүштүр шыңгыы эртип турарын ийи караа-биле көөр кылдыр, соңгулдаларны шынчы болгаш ажык-чарлыг болдурар ужурлуг бис" - деп, ол бодунуң бодалы-биле үлешкен.
Өөредилгениң түңнел чадазы август 24-те болур. Өөредилге программазын чедиишкинниг эртип алган бүгү-ле дыңнакчылар республиканың соңгулда участоктарынга ажылдаар чогуур шынзылгаларны болгаш сертификаттарны алыр.
Чыжыргана СААЯ.
Буян Ооржактың тырттырган чуруктары.
«Шын» №33 2026 чылдың август 27
"Шын" солуннуң МАХ-каналынга каттыжыңар: max.ru/channel_shyn