Социал фондуже катап шилчидип ап болур

Декабрь төнчүзүнге чедир пенсияныӊ чыылда акшазын өске фондуже шилчидип ап болур.

Чыылда акшазын өске пенсия фондузунче шилчидер деп шиитпирлеп алган болза, Россияныӊ Социал фондузунга дыӊнадыышкын киирери чугула. Ындыг документини социал фондунуӊ клиентилер хүлээр албанында болгаш Госуслуга порталында хүлээп ап турар.

Дыӊнадыышкынны берип каарга, пенсия чыылдазын өске фондуже шилчидер. Чижээ, Россияныӊ социал фондузундан үнгеш, күрүнеге хамаарышпас пенсия фондузунче шилчидер. Күрүнеге хамаарышпас ийи аӊгы фондулар аразынга база шилчидип болур. Күрүнеге хамаарышпас пенсия фондузундан үндүргеш, база катап Социал фондуже пенсия чыылдазын шилчидип ап болур.

Кижи бүрүзүнүӊ бодунуӊ пенсиязыныӊ чыылда акшазын башкарып турар фондуну билип алыр дизе, ону бо чылын өске фондуже шилчидип алырыныӊ дугайында билдириишкин кирген-кирбээнин билип алыр дизе, «Госуслуга порталында хуу кабинединден азы РСФ-тиӊ клиентилер офизинден билип ап болур.

Чыылда акшазын фондулар аразынга шилчидериниӊ дугайында билдириишкинни декабрь 1-ге чедир хүлээп ап турган. Баш бурунгаар медээлер-биле алырга, 11 ай дургузунда Тываныӊ чурттакчыларындан 323 билдириишкин кирген.

Чыылда акшазын хуусаазы келбээнде, өске фондуже шилчидип алыр деп шиитпирлээн хамаатыларга, олар инвестициялыг орулгазын ышкынып болурунуӊ айыылы бар дээрзин Социал фонд медеглээн. Хоойлу ёзугаар алырга, бир эвес чыылда акшазын чаӊгыс фондуга 5 чылдан эвээш үе дургузунда шыгжаар деп тургаш, ол хуусаа төнмээнде, өске фондуже шилчидип алырга, ооӊ инвестициялыг орулгазын тыртып кааптар.

Сөөлгү чылдарныӊ түӊнели-биле алырга, хамаатыларныӊ хөй кезии боттарыныӊ пенсия чыылдазыныӊ акша-хөреӊгизин күрүнеге хамаарышпас пенсия фондуларындан үнгеш, катап Россияныӊ Социал фондузунче шилчидип ап турарлар.

Россияныӊ Социал фондузунуӊ Тыва Республикада салбырыныӊ
медээлеринден Р. ДЕМЧИК очулдурган.

«Шын» №96 2023 чылдың декабрь 16