Оюн “Согур аза». Бир шыырак кижи Согур аза болур, бир шыырак кижи хөй уруглуг, оолдуг кадай болур, эдээнден он-чээрбизи-даа туттунчуптар, иези олурар. Азазы келгеш, кадайга таакпы сунар. Кадай таакпыны тырткаш, артында шууштур олурган уругларынга бээр, олары: «Аза таакпызы тыртпас мен, авам таакпызын тыртар мен» – дижип, ужунче үндүр сунчуп чорудуптар, оон, уруглары шупту хары угда: «Аза таакпызы тыртпас бис, авам таакпызын тыртар бис. Аза сүдү ишпес бис, авам сүдүн ижер бис» дээр. Азазы: «Артыңда чүү чүвелерил?» дээр.
Кадай: «Хөлегем-дир» дээр. Аза ол-бо талазынче топтап көргеш: «Оо, уругларың-дыр ам, бирээзин, ийизин, үжүн меңээ бер» дээр. «Уругларым бербес мен, тараа хоордуруп чиир мен, уругларым алба, малым малдап берзин» деп, кадай харыылаар, «Оода бирээзин ап көрейн» – дээр. «Чок, хоржок, бербес мен» дээрге, былаап, хунаап эгелээр. Уругларындан: «Согур аза, бисти алыр шааң-даа чок. Ававыс алыспас-даа бис» – дижип, маңнажып кезип-ле турар.
Иези Азазы-биле удур тутчуп-ла турар. Аза холу дээпсе, алганы ол. Уруглары авазынга чаннып, Азага бербес дугайында үргүлчү чугаалап, кылыр ажылдарын айтып, иезинге от оттулуп, чем кылып бээрин, тараа хооруп, мал малдап берип, азыраарын сөглеп-ле, Азазын бактап-ла турар. Иези кижи шыырак кашпагайда бербес, Аза кижи шыыракта тудуп аптар-ла чүве.
"Матпаадыр" уруглар номундан алган.
«Шын» №6 2024 чылдың январь 27