Вадим ЧЫКАЙ
СОЛДАТ-ТЫР МЕН
Ногаан-шокар шериг хепти кеткен-даа бол,
Ногаандык дег дошкун кылдыр көстүр-даа бол,
Каржы сеткил кижилерге бодап көрбээн
Камгалакчы солдат-тыр мен, бүзүреп чор!
Улай адар октуг боону чүктээн-даа бол,
Удур көрген карактарым шириин-даа бол,
Бачыт кылбас, амытанга хилинчек чок,
Багай эвес солдат-тыр мен, идегеп чор!
Өршээл билбес эжелекчи каржы дайзын
Өскен чуртум түрү базып, халдап келзе,
Өршээ бурган, мени ынчан танывас сен
Өлүр тутчур солдат-тыр мен, ынакшып чор!
ТЫВАЛАРНЫҢ БИРЭЭЗИ МЕН
Түмен шериг эреңгейлеп баштап чораан
Түрлүг-сүрлүг өгбелерин дөзеп салгаан
Соон истеп, мурнун хынап чоруп орар
Соруу чайнаан тываларның бирээзи мен!
Сылдыс-Шокар тыва малын эзертепкен,
Сыын мойнаа аргамчызын дергилепкен,
Хорагайлаан торгу тонун куржаныпкан,
Хостуг, чоргаар тываларның бирээзи мен!
Хөлегелээн булуттарны сывырылдыр,
Хөмүрерген чүректерни хөрүктелдир,
Хөөмей-сыгыт, каргыраазын хоюңнаткан,
Хөгжүм ойнаан тываларның бирээзи мен!
Аңчы, малчын аймак чонум Наадымынга
Арзылаң, чаан, начыннарның аразынга
Шүүргедеп, хоюп, чедип, шу-лап тургаш,
Шүглүп үнер тываларның бирээзи мен!
Даңза солчуп, даңгырактыг сөзүн берген
Даянгыыш бооп, дамырактар каттыштырган,
Дайын келзе, дажыг хем дег улдап кирер
Дадай дивес тываларның бирээзи мен!
"Шын" №31 2023 чылдың апрель 29