Федералдыг шииткел албанының Тыва Республика талазы-биле эргелелиниң кинологтары «Индиго» интеллектуалдыг сайзырал төвүнде өөренип турар уругларга аалдап четкен.
Албан чериниң кинологу Айдың Куулар уругларга кинологтуң ажылының болгаш ыттарны кандыг эртемнерге өөредириниң база кинолог мергежилди каяа чедип алырының дугайында тайылбырлаан.
Кинолог кады ажылдап турар ыды Альфа-биле янзы-бүрү аргаларны уругларга көргүскен. Альфа ээзиниң даалгаларын доозазын күүсеткеш, чалыы көрүкчүлерниң кичээнгейин хаара туткан. Бичии уруглар Айдың Куулар биле Альфаның аразында харылзаалыг кады ажылдажылганы көргеш, диңмиттии-биле адыш часкаашкыннары-биле хүлээп алганнар.
Кижилерни болгаш аңгы-аңгы чүүлдерни ыттың дузазы-биле канчаар дилээриниң дугайында янзы-бүрү аргаларны школачыларга ажылдакчылар көргүскен.
Бистиң корр.
Россияның Шииткел күүседириниң федералдыг албанының Тыва Республика талазы-биле эргелелиниң медээзи болгаш чуруктары.
“Шын” №10 2026 чылдың март 19