Эрзин кожууннуң төп уруглар ном саңының адын шүлүкчү, очулдурукчу, Россияның Чогаалчылар эвилелиниң, Тыва Республиканың чогаалчылар эвилелиниң кежигүнү Бижек Комбу Дойдуловичиниң ады биле адаандан бээр 8 чыл болу берген.
Комбу Дойдулович боду Москва хоорайда чурттап чоруур-даа болза, чылдың-на чайгы үеде Тывага келгеш, өскен төрээн Эрзининде уруглар ном саңынга кээп, аңаа улуг-биче чону-биле ужуражырынга ынак.
Бо чылын база-ла август 23-түң хүнүнде бо-ла ном саңынга "Төрээн черим, чүрээм согуу" деп чечен сөстүг, литературлуг ужуражылгаже чонун чалаан. Эрзин кожууннуң төпчүткен библиотека системазының ажылдакчылары "Уран сөстүң сиилбикчизи" деп аттыг делгереңгей ном делгелгезин белеткеп, келген аалчыларга таныштырган. Ужуражылганы Даң-Хаяа Кеский-оол удуртуп эрттирген.
Комбу Дойдулович бодунуң допчу-намдарын, шүлүк чогаалының идеязы, аяннажылгазын, чогаалдарының маадырларының овур-хевирлерин, салым-хуузун канчап бодал-сагышка тыптып келирин, өзүп орар салгалдарга, аалчыларга кончуг солун, чедимчелиг тайылбырлап берген.
Комбу Дойдулович талантылыг шүлүкчү боорундан аңгыда, болза-даа хөглүг-баштак аажы-чаңныг кижи дээрзин олурганнар магадааннар. Келген аалчылар, уруглар, улуг назылыглар чогаалчыга сонуургаан айтырыгларын салып, хемчегге идепкейлиг киржирге, ужуражылга солун болгаш хөглүг эрткен.
Мындыг хевирлиг ужуражылгалар база катап ном болгаш номчулганың чугулазын херечилеп турарын демдеглекседивис. Тыва Республиканың культура сайыды С.В. Чигжит, Республиканың уруглар ном саңының даргазы С.Б. Лопсан, Россияның база Тываның чогаалчылар эвилелдериниң кежигүнү К. Балчый, "Алдын кушкаш" бичии уруглар сеткүүлүнүң кол редактору, чогаалчы, Россияның база Тываның чогаалчылар эвилелдериниң кежигүнү А.С. Шоюн, билдингир поэтесса, Россияның база Тываның чогаалчылар эвилелдериниң кежигүнү Л.Х. Иргит, уруглар чогаалчызы К.-К. К. Чоо- ду, А.С. Санчай, Эрзин кожууннуң культура болгаш туризм даргазы О.В. Куулар олар болгаш ооң чаңгыс чер чурттуглары чылыг-чымчак сөстер-биле байыр чедирген.
Ужуражылга Б.К. Дойдуловичиниң сөзүнге бижиттинген "Алимаа" деп ыры-биле доозулган. Чараш ыры хамыктың чүректерин доюлдуруп, чараш, чаагай бодалдарны арттырган.
Чейнеш ШОМБУН.
«Шын» №34 2025 чылдың сентябрь 4