Бичии суурга хоочун шевер чурттап чораан. Бир-ле катап аңаа аныяк оол чедип келгеш:
– Башкы, мерген угаанныг апаарынга мени өөредип калыңарам. Мээң чуртталгамны экижидиптер чаңгыс дүрүмден айтып бериңерем – деп чугаалаан.
Шевер хүлүмзүргеш, оолду хем кыдыынга эккелген. Олар аңаа ыытташпайн кезек олурганнар. Шевер холун сугже суккаш, салааларын салбараңнадып олурган. Хенертен оолду читкезинден алгаш, сугже киир идипкен. Аныяк оол корга бергеш, сугдан үнерин оралдажып турган. Тыныжы чедишпестээш, өлүрүм ол-дур деп бодапкан. Ол үеде шевер оолду туткаш, эрикче үндүрүп эккелген.
– Бо үеде чүнү билдиң? – деп, шевер айтырган.
– Тыныксап турдум. Агаар тынмас болзумза, өлүрүм ол-дур деп бодаптым – деп, оол харыылаан.
– Шын-дыр – деп, шевер чугаалаан. – Мерген угаан чедип алырын оралдажып тургаш, кандыг-даа үеде билир чүүлүңнү хенертен уттуп болур сен. Ынчалза-даа бир-ле чүүлдүң чугулазы сээң күзелиңниң күштүүнден хамааржыр, ынчан агаарже орукту канчаар-даа тып алыр сен. Күзел – мерген угаанче ёзулуг дүлгүүр ол-дур.
Аныяк оол боданып туруп-туруп чорупкан. Хөй-ле чылдар дургузунда ол шеверниң далаш чокка чугаалап чораан төөгүлерин дыңнавышаан, ооң бичии-бичии даалгаларын күүсетпишаан, катап база шеверге чедип келген. Оол чоорту мерген угаан сөстерде эвес, а бодунуң сорулгазын чүрээниң ханызындан утпайн, сактып, бодап, ону чедип алыр дээш, суг кырынга безин шиитпирлиг болуру деп билген.
Хүн бүрүзү кичээл болзун: ат-алдар чедип алырынче эвес, а бо чуртталгада чүү дээш төрүттүнүп келген сен, ол сорулгаңче чүткү.
Чурукту Сhad Al нейросетьтен алган.
“Шын” №32 2025 чылдың август 21