«Совет Тыва» делгелгени ажыткан

1944 чылда Тыва Арат Республика ССРЭ-ниң составынче эки тура-биле бактаап кирген. Оон бээр 80 чылдар шуужуп эрткен. Ынча чылдарның дургузунда Тывага кандыг өскерлиишкиннер болбаан дээрил. Эрткен үени сактып, амгы үеде Тывавыстың кайы хире сайзырай бергенин көргеш, өөрүвестиң аргазы чок.

Совет Эвилелинге каттышкаш, ада-өгбелеривис көшкүн амыдыралдан сууржуң амыдыралче шилчээн. Амгы үе-биле ынчангы үени деңнээри канчап-даа болдунмас. Улуг чурттуң составынче бактаап киргениниң ачызында төрээн Тывавыска сайзырал эгелээн.

Бо хүннерде ТАР-ның ССРЭ-ге каттышканындан бээр 80 чыл болган оюн уткуштур регионга янзы-бүрү хемчеглерни эрттирип, байырлаан. Хемчеглерниң бирээзи – Тываның Алдан-Маадыр аттыг Национал музейинге «Совет Тыва» деп делгелгениң ажыдыышкыны октябрь 10-да болуп эрткен. ТР-ниң Дээди Хуралының Даргазы Каң-оол Даваа, Национал музейниң директору Каадыр-оол Бичелдей, Күрүне Думазының депутады Анжелика Глазкова болгаш өскелер-даа байырлалга киришкен. «Совет Тыва» делгелгени ажыдып, кызыл кожааны кескен.

«Совет Тыва» делгелгеде ТАРП ТК бирги секретары, генерал-лейтенант С. К.-Х. Токаның орден-медальдарын, хевин делгээн. Тываның совет үеде ниитилел-политиктиг, социал-экономиктиг, культурлуг сайзыралын көргүскен онзагай экспонаттар делгелгеде бар. Орус болгаш тыва чоннуң амыдыралынга ажыглап чорааны эт-севи, кедип чораан идик-хеви база амгы үениң аныяктарынга-даа, ынчангы үеде чурттап чораан улуг улуска-даа сонуурганчыг чүүлдер хөй болган.
Байырлалга келген хүндүлүг аалчылар тус-тузунда сөс алгаш, байыр чедирген соонда, музейниң ажылдакчызы келген аалчыларга солун болгаш ажыктыг экскурсияны чоруткан.

Юбилейлиг чылда ажыттынган «Совет Тыва» делгелгени ажы-төлге сонуургадыры артык эвес.

Бистиң корр.
Шончалай ХОВАЛЫГНЫҢ тырттырган чуруктары.

«Шын» №78 2024 чылдың октябрь 12