Чазак Даргазының Кубогу дээш бут бөмбүү
Кызылга 5 чыл аттыг стадионга октябрь 8-12 хүннеринде Чазак Даргазының шаңналы дээш 18 хар чедир оолдар аразынга бут бөмбүүнүң маргылдаазы бедик деңнелге болуп эрткен. Маргылдаага Кызыл-1, Кызыл-2, Ак-Довурак, Бай-Тайга, Сүт-Хөл, Таңды, Эрзин, Интер (Кызыл кожуун) шилиттинген 8 шыырак команда киришкеннер.
Республиканың Спорт яамызы база спортчу командалар белеткээр төптүң дыңнадыы-биле, ойнакчы бүрүзү, чурум ёзугаар Россияның Бут бөмбүүнүң эвилелиниң даңзызынче киир бижиткен болуп турар. Дөрт хүн иштинде үргүлчүлээн чидиг оюннарның түңнелинде дараазында
командалар шаңналдыг черлерже киргеннер. Бирги черни Кызыл-1, ийиги черни Кызыл-2, 3-4 дугаар черлерни Ак-Довурак биле Бай-Тайга командалары үлешкеннер. Тускай шаңналдарны тергиин хаалгачы, халдакчы, ойнакчы деп 3 аңгы хевирге тывыскан.
Хол бөмбүүнге республиканың бирги чери дээш маргылдаа
“Сүбедей” спорт ордузунга октябрь 9-12 хүннеринде 18 хар чедир оолдар, уруглар аразынга республиканың бирги чери дээш хол бөмбүүнге маргылдаа болган. Аңаа ниитизи-биле 400 хире ойнакчы база 37 команда, оларның иштинде 18 эр, 19 херээжен команда киришкен. Маргылдааның кол сорулгазы “Хол бөмбүү өөредилге черлеринче” деп төлевилелди боттандырары база шыырак ойнакчыларны, командаларны аңгы-аңгы Россия чергелиг оюннарга белеткээри болур.
Чурум ёзугаар командалар 4 бөлүкке күжүн шенеп ойнаан. Оолдар аразынга түңнел оюнда Чеди-Хөл кожууннуң ойнакчылары чараш, дидим халдап тургаш, удурланыкчызы “Сүбедей” командазын уткаш, бирги черге төлептиг болганнар. База 2-3 дугаар черлерни “Сүбедей”, Бай-Тайга командалары алганнар. Уруглар аразынга 1-ги черге Ак-Довурактың демниг командазы төлептиг болган. Дараазында 2-3 дугаар черлерни “Каа-Хем” биле “Сүбедей” командалары үлешкеннер.
Төрүттүнген хүнге тураскааткан дүрген шыдыраа оюну
Кызылдың немелде өөредилге төвүнге октябрь 11-де республиканың 11 харлыг оолдар аразынга дүрген шыдыраага тиилекчизи Эрик Ондарның төрүттүнген хүнүнге тураскааткан солун шыдыраа маргылдаазы бедик деңнелге болуп эрткен. Аңаа ниитизи-биле 65 чалыы шыдыраачылар киришкен. Оларның аразында Новосибирскиге октябрь 1-5 хүннеринде Россияның чалыылар Кубогунуң чадазының тергииннери Самбуу Ондар, Эрик Ондар, 15 хар чедир уруглар аразынга 3-кү шаңнал — хүлер медаль эдилекчизи Анастасия Ооржак бар. Чараш, солун маргылдааны Эриктиң ачазы, тренери ТШО-нуң киржикчизи, хоочуну – Георгий Ондар тускай белек-селектиг эрттирген. Түңнелинде шыырак оолдар аразынга 1-ги черни Мөңгүн Сарыг-Лама, 2-3-кү черлерни Дүгер Допай биле Владимир Куулар алганнар. Уруглар аразынга эки түңнелди Долзат Наксыл көргүскен. Дараазында эгелеп чоруур 11 хар чедир ойнакчылар аразынга 1-ги черни Самба Ондар, 2-3-кү черлерни Эрик Ондар биле Долума Очур-оол алганнар. Тиилекчилер база 2-3 дугаар чер алган ойнакчылар улуг деткикчи Георгий Ондарның холундан тускай шаңналдарны алганнар.
Кик-бокска ХI дугаар делегей Кубогунуң тиилекчилери
Чебоксары хоорайга октябрь 5-10 хүннеринде кик-бокска ХI дугаар делегей Кубогу база II дугаар бүгү-делегей чоннарының аразында тевер-шанчарынга маргылдаа бедик деңнелге болуп эрткен. Ол маргылдаага делегейниң 20 чурттарындан 1000 ажыг шыырак спортчулар киришкен. Аңаа бистиң республикадан ОЛИМП аттыг спорт школазының 7 спортчузу чедиишкинниг киржип, дараазында бедик шаңналдыг черлерни алганнар. Бирги черлерге дараазында спортчулар төлептиг болган: Ачыты Самбала 81 килге (Лоу-кик), Амыр-Санаа Салчак 71 килге (Лоу-кик), Сайлык Салчак 52 килге (Лоу-кик), Айгуль Монгуш 44 килге (Лоу-кик), Айдемир Байлакай 57 килге (К1). База 2-3 дугаар черлерни Тензин Салчак 57 килге (Лоу-кик) биле Ая Шоюр-оол 60 килден өрү алганнар.
Алексей ЧАМБАЛ-ООЛ, спорттуң хоочуну.