Спортчу Тыва "ЗАБЕГТЕ"

Май 19-та бүгү чуртка «Забег.РФ» чадаг чарыш болуп эрткен. Тывага беш дугаар эрткени ол. Республиканың Баштыңы Владислав Ховалыг киржикчилерге байырны чедирген: «Бөгүн Тыва "ЗаБег" улуг спортчу хемчегниң киржикчизи болган. Чартык марафон 16 чуртту каттыштырып, 180 муң ажыг киржикчилерни хаара туткан. Массалыг улуг спортчу байырлалды организастааны дээш Ксения Шойгунуң командазынга байыр чедирип тур мен!».

Мөөрейниң организакчылары чыл санында чарыштың киржикчилери көвүдеп турарын демдеглээн. Бо чылын профессионал спортчулар база маңнаарынга ынак 1000 хире кижи Кызылдың төвүнден деңге чаржып үнген.

Марафонга 7 хардан өрү назылыг Кызылдың чурттакчылары болгаш аалчылары киришкен. Киржикчилер шыдал-күжүн көрүп, 1, 5, 10 база 21 километр хемчээлдиң чарыжынга боттарын шенээн.

Улуг-Хем кожуундан Ольга Ондар улуг назынныг киржикчилерниң бирээзи. Ол бо чылын 64 харлаар, ол хире назынныглар аразында 21 километр хемчээлде чаңгыс херээжен спортчу. Маргылдааның дүрүмү база киржикчиниң күзели-биле 18–44 харлыг херээжен спортчулар аразынга киришкеш, дөрткү черни төлептиг ээлээн. Ольга маңнаарындан аңгыда, хаак база скайрайнинг спортун сонуургаар. Ол чүгле бо чылда 24 маргылдаага киришкен.

Марафонга коллективтер база өөредилге черлери идепкейлиг болганын Тываның Спорт яамызы демдеглээн. Федералдыг үндүрүг албанының Тывада эргелели, Промсвязьбанк, адаптивтиг спорттуң школазы база Кызылдың президентиниң кадет училищезиниң сургуулдары – маргылдааның доктаамал киржикчилери.

21 километр хемчээлдиг чарышка Айдың Сат, херээженнерден Айгуль Күвезин кымны мурнай финишке келгеннер. Аңгы-аңгы бөлүктерге эң эки көргүзүглерлиг 50 спортчуну дипломнар, медальдар-биле шаңнап, марафоннуң деткикчилеринден спортчу чемнерни тывыскан.

Бистиң корр.
«Шын» №37 2024 чылдың май 22