Спортчулар элбек болзун!

Сөөлгү чылдарда республикага «Аныяк өг-бүлеге – кыштаг», «Эзирлер уязы», «Инек – чемгерикчи малым» дээш өске-даа губернатор төлевилелдери чедиишкинниг ажылдап турарын билир бис. Төлевилел бүрүзү республиканың социал-экономиктиг хөгжүлдезинге аажок ужур-дузалыг дээрзин амыдырал бадыткаан.

Ук төлевилелдерниң бирээзи «Эзирлерниң уязы» 2020 чылда эгезин салган. Бо хүннерде республикавыстың аңгы-аңгы кожууннарының көдээ суурларында, «Эзирлер уязы» деп адаарывыс, өг хевирлиг кылдыр кылган хүрежир спортчу өргээлер немежип турары көскү.

2022 чылда регионнуң 10 суурунга «Эзирлер уязы» спортчу залдар тудар сорулганы ТР-ниң Спорт яамызы салган. Бо ажылче республика бюджединден 23,1 сая рубльди аңгылаан. Төлевилел бүрүзүнге 4 сая хире рубль онаажыр.

Сүт-Хөл кожууннуң Бора-Тайга, Таңды кожууннуң Кызыл-Арыг болгаш Чеди-Хөлдүң Элегес сумуларында тудуг объектилеринде ажыл кайы хире чоруп турарын сонуургадывыс.

Элегес суурда «Эзирлер уязы» төлевилелдиң тудуун тус черниң хоочуну Виктор Татун-оолович Чооду удуртуп турар. Ол амгы үеде хүндүлүг дыштанылгада-даа болза, төрээн чериниң сайзыралы дээш бүгү күжүн тудуг ажылынче үндүрүп, кончуг идепкейлиг ажылдап турар.

Кудумчулар аайы-биле ээлчег езугаар тудугжуларны чемгерип турар. Соңгалар, эжиктер салыры болгаш иштики ажылдар кылыры арткан. Тудуг удавас дооступ, ажыглалче кирер. Спортчу залдың чанында кожа турар Культура бажыңының одалга черинге немей котел салгаш, чылыдылга айтырыын шиитпирлээри планда көрдүнген.

«Чаа соруктуң» киржикчизи Альберт Ховалыг, «кыштагжы» Херел Иргит, суурнуң депутады – Саглай Иргит тудугжуларга изиг чем кылырынга бир-бир хойларны тудуп берип, хөй-ниитиниң тудуунга өг-бүлезиниң өмүнээзинден үлүг-хуузун киириштирген. Оон аңгыда, Элегес суурнуң хоочун башкыларының ажы-төлү Ким Оюн, Таймир Күжүгет олар амгы үеде найысылалда чурттап, ажылдап чоруур-даа болза, чоннуң тудуунга аъш-чем садарынга 10 муң акшаның сертификадын белекке бергенин демдеглээр апаар.

«Эзирлер уязы» деп чараш өргээниң тудуу удавас дооступ, суурнуң улуг-биче чонунга өөрүшкүнү сөңнээр дээрзи чугаажок. Элегес суурга хүрештиң аңгы-аңгы хевирлеринге спортчулар элбек-ле болзун!

Айдың ОНДАР.
Чуруктарны сумунуң архивинден алган.