Тываның көдээ ажыл-агый техникумунуң студентилери Кызыл кожууннуң часкы хову ажылдарында хаара туттунган. Ол дугайында Тываның Баштыңы Владислав Ховалыг социал четкилерде арынында демдеглээн:
«Тываның көдээ ажыл-агый техникумунуң студентилери Кызыл кожууннуң часкы хову ажылдарынче үнген. Дугурушканывыс езугаар тарылга шөлү база үрезинни Тываның база бир улуг көдээ ажыл-агый бүдүрүкчүзү Александр Желтухин техникумга аңгылаан.
Бүдүрүлге мастерлери студентилерге техниканы хову шөлдеринге-ле айтып берип, улаштыр тарылга ажылдарынче кирип турарлар. Аныяктар ооң мурнунда теория кырында өөренген. Студентилер мал чемин тарып эгелээн. Ооң соонда ону садар аргалыг. Арга-дуржулгазы бар. Техникумда мал чеми белеткээр цехти ажыткан, чурттакчы чонда хереглелдиг.
Техникум — "Профессионалитет" федералдыг төлевилелдиң күүседикчизи, ооң баазазы Балгазында Тываның агробүдүрүлге техникуму болуп, амгы үениң чаа техниказында чер ажылының чурагайлыг аргаларын ажыглавышаан, часкы хову ажылдарынче кирипкен. Федералдыг төлевилелди амыдыралга боттандырарының талазы-биле база бедик мергежилдиг специалистерни белеткээри-биле, республиканың билдингир фермерлери Михаил Санников болгаш Алёна Куулар техникумнуң партнерлары болган».
ТР-ниң Өөредилге яамызының медээлеринден.
«Шын» №37 2024 чылдың май 22