Дүүн, ноябрь 1-де, суд приставтары профессионал байырлалын демдеглеп эрттирген. Олар хүннүң-не, өрелиг кижилер-биле ажылдавышаан, амыдыралдың нарын байдалдарынга таваржып турарлар. Амгы үеде Россияга суд приставтарының ажыл-агыйы кончуг ужур-дузалыг. Ооң ажылдакчылары судтуң болгаш өске-даа органнарның, албан-дужаалдыг кижилерниң шиитпирлери, доктаалдары-биле ажылдап турарлар. Ынчангаш оларның хүлээлгези – бодун туттунуп билири болгаш шыдамык болуру.
Бо ажыл чүгле мага-боттуң күжүн үндүрер эвес, а сагыш-сеткилге кончуг берге ажыл. Суд приставтарының байырлалын 2009 чылда Президентиниң Чарлыы-биле ноябрь 1-де демдеглеп эгелээн.
Россияның федералдыг суд приставтарының Тыва Республикада эргелелиниң үре-түңнелдиг ажылының ачызында бо чылдың 10 айының дургузунда күрүнеге, албан черлеринге болгаш кижилерге ажыктыг болзун дээш, 1775 млн. рубль өрени тырткан. Эрткен чылга деңнээрге 243 млн. рубль хөй болган. Оон аңгыда назы четпээн уругларның алиментизи дээш 125 млн. рубльди тырттарынга дузалашкан.
Суд приставтар албанының ТР-де эргелелиниң медээлеринден