Бии-Хем кожуунда Каък-Хөл деп черде малчын аалга турган оолдар мал-маганны аъттыг кадарып чорааш, электри четкизиниң черге чавызадыр халайып бады барган демир удазыннарынга таварышкаш, кемдеп-кергээн. Оларның бирээзи 17 харлыг элээди оолдуң амы-тынындан чарылганының дугайында медээ 2023 чылдың чайын бүгү республикага тараан.
Бо айыыл-халаптыг болуушкуннуң истелгези бир чыл ажыг хире үе дургузунда уламчылаан. «Россети Сибирь Тываэнерго» акционерлиг ниитилелге хамааржыр 35 кВ күчүлүг электри четкизиниң Өөк биле Аржаан суурларның аразында участогунда шугумунга хамаатыларның айыыл чок чоруун хандырар талазы-биле камгалал ажылдарын чорутпайн турганы айыыл-халаптың кол чылдагааны болган дээрзин истелге илередип тодараткан.
«Россети Сибирь Тываэнерго» акционерлиг ниитилелдиң Бедик вольтулуг электрошугумнар албанының даргазынга ажылдап турган хамаатыны РФ-тиң Кеземче хоойлузунуң 118-ки чүүлүнүң 2-ги кезээ ёзугаар (бодунуң профессионал хүлээлгелерин чогууру-биле күүсетпээн уржуунда, оваарымча чогу-биле хамаатының кадыкшылынга аар кемдээшкинни чедиргени) буруудаткан түңнелди Бии-Хем кожууннуң прокурору деткип бадылаан.
«Россети Сибирь Тываэнерго» акционерлиг ниитилелдиң Бедик вольтулуг электрошугумнар албанының даргазынга ажылдап турган хамаатыны судтаар. Кеземче херээн Тыва Республиканың Кызылдың район судунга дамчыткан.
С.А. Ооржак,
республика прокурорунуң улуг дузалакчызы.
“Шын” №79 2024 чылдың октябрь 16