Найысылалдыӊ суг арыглаар тудугларын чада аайы-биле чаартып кылырыныӊ дугайында шиитпирни Тываныӊ Баштыӊы ажыл-агыйжы үнүүшкүн үезинде хүлээп алган.
«Водоканал-сервистиӊ» объектилеринге ол профильдиг сайыттар-биле кады барып чораан. Тывага 2030 чылга чедир 400 муӊ дөрбелчин метр шөлдүг чуртталга бажыӊнарын дужаарын планнап турар болганда, ук объектини эде кылыры амгы үеде чидиг айтырыг апарган дээрзин Владислав Ховалыг демдеглээн.
«Специалистерниӊ санаашкыны-биле алырга, 10 муӊдан 13 муӊ хире кубометр суг немежип келир» — деп, ол социал четкилерге бижээн.
Кызылдыӊ суг арыглаар тудуун 1988 чылда кылган. Ооӊ соонда бир чыл чартык хире болганда, ону чаартып эде кылыр ужурга таварышкан.
«Водоканал-Сервис» компанияныӊ медээзи-биле алырга, суг арыглаар черниӊ эӊ-не шынарлыг күчүзү — 16 муӊ кубометр. Хөй суг агып бадып турар үеде ооӊ күчүзү 20 муӊ кубометр чедип турар апарган. Суггур чаъстар чагган соонда, 24 муӊ кубометр-даа апаар. Ындыг үеде хөөлбектелип чыглы берген сугларны бүдүрүлге долузу-биле арыглап шыдавайн турар. Хоорзалардан аттыгып үнген довурактыг сугнуӊ Улуг-Хемче агып бадып турарын көргүзүп турар видеонуӊ интернет четкизинде үнүп келгенин «Водоканал-Сервис» ынчаар тайылбырлаан.
«Суг арыглаар тудугларны чаартып эде кылыр төлевилелди дүргедедип турар бис. Федералдыг Чазак-биле ону дугуржуп ажылдап тур бис. Суг арыглаар тудугнуӊ күчү-шыдалын чоорту улгаттырары кедилиг деп көрүп тур мен. Бо чоокку чылдарда ооӊ күчүзүн 30 муӊ кубометр чедирип алыр болза, ол четчир боор. Ооӊ өртээ 1,5 - 3 млрд рубль бооп болур. Ийи дугаар вариантыны шалыпкын кылыры белен болур» — деп, Тываныӊ Баштыӊы ажыл-агыйжы үнүүшкүннүӊ түӊнелинде блогунга бижээн.
Тыва Республиканыӊ Чазааныӊ медээлеринден Р. Демчик белеткээн.