Кызылда чаа суг сордурар күштүг станция биле соок суг хандырылгазынга ажыглаар хоорзаларны ажыткан.
Ноябрь 5-те Кызылдың мурнуу-чөөн чүгүнде чаа суг сордурар станция биле 6 километр узун соок суг хандырылгазынга ажыглаар хоорзаларны ажыткан. ТР-ниң Чазак Баштыңы Владислав Ховалыг хоорайның чаа туттунуп турар кварталын болгаш ол чоок-кавыда чуртталга бажыңнарының суг-биле хандырылгазын экижидеринге чаа ажыткан инфраструктура дыка улуг идигни бээр дээрзин демдеглээн.
Чаа объект удавас калбартыр деп турар Тиилелге кудумчузунуң чанында турар. Бо төлевилелди боттандырарынга бир чыл негеттинген. Ону Президентиниң “Чурттаар оран-сава болгаш хоорай хүрээлеңи” национал төлевилелиниң иштинче кирип турар “Арыг суг” деп федералдыг программаның деткимчези-биле боттандырган. Ажылдың ниити чарыгдалы 233 сая рубль, ооң иштинде чүгле суг сордурар станцияның тудуунче 69 сая рубльди чараан. Чаа ажыттынган объект хоорайны бир хүнде 14 муң кубометр суг-биле хандырыптар аргалыг.
Бистиң корр.
“Шын” №85 2024 чылдың ноябрь 6