Хову-шөлге тарып өстүрүп алыр чемниг үнүжүвүс — сула (овёс). Ону мал чеминге ажыглап турар-даа болза, ол кижиниң кадыынга онзагай дузалаар эм үнүш болур. Суланы шаг-төөгүден бээр бо хүнге чедир улусчу эмнээшкинге ажыглап турар бис.
Суланы, анаа-ла хүннүң-не чемнениринге ажыглаар кылдыр чаңчылчыдып алыр болза, кадыкшыл быжыг болур. Чүге дээрге ол бүгү-ле аарыгларны баш удур болдурбас аргалыг эм үнүш. Суланың тургузуунда хөй-ле витаминнер, микроэлементилер бар, ылаңгыя "В" бөлүктүң витаминнери эң-не хөй.
Суладан кылган хандыны ижерге, иммунитет быжыгар, улуг килди бадырар, баарны арыглаар, магний деп бүдүмели хөй болганындан чүрек болгаш нерв аарыгларын эмнээринге улуг идиг бээр, сөөк-даякты болгаш дамырларны быжыктырар, чүрек согуун өйлээр, баарның янзы-бүрү аарыгларынга дузалаар, арагалаар болгаш хөй таакпылаар багай чаңчылдардан адырлып алырынга дузалаар.
Хандыны кылыры: 3 стакан суланы арыглап, аштап, чуп алгаш, 3 литр изиг сугже урупкаш, сугну үр үеде изиг тургузар азы термоска кылып алыр. Хондур тургузар. Сыскап алгаш, чемненир мурнунда 30–40 минута бурунгаар ижип алыр. Бир хүнде 1 литр чедир ижер. 2 неделя ижип болур. Хоралыг чүүлү чок.
Ая УСПУН.
“Шын” №82 2023 чылдың октябрь 28