Бөгүн Тыва Республика Ордениниң кавалери, сураглыг мөге Аяс Монгуш 50 харлап турар. Ооң мугур харлаан юбилейин таварыштыр Тываның Баштыңы Владислав Ховалыг байыр чедирген.
«Хүреш – бистиң культуравыстың бурун кезээ. Аяс Семис-оолович национал хүрешке бүгү назынын бараалгаткан. Ол республика Наадымының 17 дакпыр чемпиону.
Сумога элээн улуг чедиишкиннерлиг, делегей чергелиг ийи дакпыр чемпион болган. Ооң шылгараңгай спортчу чедиишкиннери Тываның төөгүзүнге кезээ мөңгеде артар.
Юбилейлиг хүнүнде ол Кызыл хоорайда Бүгү-российжи хүреш фестивалын эрттирип турар. Шупту киржикчилерге байыр чедирбишаан, шылгарааннарга тиилелгени күзедим!
Аяс Семис-ооловичиге быжыг кадыкшылды, республиказының ат-алдары дээш чаа-чаа чедиишкиннерни күзедим» - деп, Владислав Ховалыг чугаалаан.
#ТываныңБаштыңы #ВладиславХовалыг #Байырчедириишкини #Шынсолун #Юбилей #Тывадыл
Сураглыг мөге Аяс Монгушка байыр чедирген.
2 апреля 2023
39